एपीबी माझाला दिलेल्या प्रतिक्रियेत करुणा शर्मा म्हणाल्या की, मी न्यायालयाचे खूप आभार मानते, आज सत्याचा विजय झाला आहे. न्यायालयात न्याय मिळत नाही असं लोकांना वाटतं, पण मला न्याय मिळाला आहे. याआधीही औरंगाबार न्यायालयात माझा विजय झाला होता. आजही माझ्या बाजुने निकाल लागला, मी न्यायालयाचे आणि न्यायाधीशांचे आभार मानते.

माझे मुलं माझ्यासोबत आहेत, त्यामुळे तिघांना ५-५ लाख असे १५ लाख मिळावे अशी माझी मागणी होती. पण, न्यायालयाने २ लाख दिले, या निर्णयाविरोधात मी उच्च न्यायालयात पुन्हा दाद मागणार आहे.

आज आमचा विजय झाला आहे – करुणा मुंडे

महिलांना खूप त्रास आहे. गेल्या तीन वर्षांपासून मी फक्त पोटगीसाठी लढत आहे. मी सांगू शकत नाही की मला किती त्रास झाला आहे, असं बोलताना करुणा शर्मांना रडू आवरलं नाही. विना नवऱ्याचं जगणं एका महिलेसाठी किती अवघड आहे. जेव्हा आपला नवरा खूप मोठ्या पदावर असतो, संपूर्ण सिस्टिम त्याच्या बाजूने असतं, त्याच्यासोबत लढणं खूप कठीण असते. एका मंत्र्यासोबत माझी लढाई होती. माझ्या वकिलासमोर खूप मोठे वकील होते. मी माझ्या वकिलांचेही आभार मानते. बीडचे वकील गणेश कोल्हे यांनी माझ्याकडून एक रुपयाही न घेता हा खटला लढला. आज आमचा विजय झाला आहे. त्यांच्यासोबत मोठमोठे राजकारणी होते, माझ्यासोबत साधारण वकील होते.

मी १९९६ पासून माझ्या नवऱ्यासोबत होती, तेव्हापासूनची जी आमची जगण्याची पद्धत आहे त्यासाठी आम्हाला १५ लाख पोटगी मिळायला हवी होती. त्यासाठी मी उच्च न्यायालयात जाणार आहे.

खूप त्रास सहन केला – करुणा शर्मा

माझी गाडी जी मला त्यांनी दिली होती ती दुसऱ्याच्या नावावर होती, ती मर्सिडीज गाडी उचलून घेऊन नेली आणि त्यांच्या वकिलाला दिली. मला हे आधी माहिती नव्हतं की अचानक आमचं भांडण होणार आहे, त्यातून माझा नवरा माझी गाडी उचलून त्याच्या वकिलाला देणार.

माझ्या गाडीत दोन रिव्हॉलव्हर टाकल्या, माझ्यासोबत बीडच्या जिल्हाधिकारी कार्यालयात जिल्हाधिकाऱ्यांच्या कार्यालयात मारहाण झाली आहे. माझी गाडी फोडली, मला येरवडा तुरुंगात ४५ दिवस ठेवण्यात आलं. मला बाहेर काढायला कोणी नव्हतं. बीड तुरुंगात १६ दिवस ठेवलं.

मी १०० टक्के लढाई लढली आहे. पण ही लढाई पुढेही सुरुच राहणार, दोन लाखात काही होत नाही, १५ लाख पोटगी मिळावी यासाठी हाय कोर्टात जाणार.