वसंत मोरे यांनी पुण्यातील गळती रोखण्यासाठी मोठं पाऊल उचललं आहे. उद्धव ठाकरेंची भेट घेत पुण्यातील कार्यकर्त्यांना भेटण्यासाठी वेळ मागितली. उद्धव ठाकरे यांची भेट घेतल्यानंतर वसंत मोरे यांनी ते पुणे शहरातील शाखाप्रमुखांना भेटणार असल्याची माहिती दिली. डॅमेज कंट्रोलसाठी ठाकरे गट तयारीला लागला असून आता ते कितपत यशस्वी ठरतात हे पाहणं महत्त्वाचं ठरणार आहे. एकनाथ शिंदे यांच्या शिवसेनेचे ऑपरेशन टायगर मोठा धोका ठाकरेंना असणार आहे. तर दुसरीकडे भाजपही अनेक नेत्यांना आपल्या जाळ्यात घेत आहे.

गेल्या महिन्यात ठाकरे गटाला मोठा धक्का बसल्याचं पाहायला मिळालं. ठाकरे गटाचे पाच नगरसेवक विशाल धनवडे, बाळासाहेब ओसवाल, संगीता ठोसर, पल्लवी जावळे आणि प्राची आल्हाट यांची भाजपमध्ये प्रवेश केला होता. पुण्यातील शिवसेनेला कोणी वाली उरलेला नाही. लोकसभा, विधानसभेला कोणत्याही शिवसैनिकाला मदत केली गेली नसल्याचा आरोप विशाल धनवडेंनी केला होता. त्यामुळे पुण्यात भाजपने आतापासूनच खिंडार पाडायला सुरूवात केली आहे. ठाकरे गटासमोर संभाव्य फूट रोखण्यासाठी भाजप आणि शिंदे गट अशी दोन आव्हाने आहेत. सर्वात महत्त्वाचं म्हणजे अजित पवार पालकमंत्री असल्याने तेसुद्धा अनक नेत्यांना आपल्या खेचू शकतात. पुणे महापालिकेवर कोणाचा झेंडा फडकणार याची औत्सुकता सर्वांनी लागली आहे.