जाधवर इन्स्टिट्यूटकडून छगन भुजबळ यांच्या मुलाखतीचा कार्यक्रम आयोजित करण्यात आला होता. यावेळी छगन भुजबळ यांना मिश्किल प्रश्न विचारण्यात आला की, मुलांच्या भाषेत बोलायचं झालं तर ज्येष्ठ नेते शरद पवार भाजपला आय लव्ह यू म्हणत होते, पण लग्न करत नव्हते? त्यावर भुजबळांनी देखील मिश्किलपणे उत्तर देत, “आम्ही भाजपसोबत कुठे लग्न केलं आहे? आम्ही फक्त त्यांच्या बरोबर आहोत”, असं म्हटलं.

छगन भुजबळ तेलगी प्रकरणावर काय म्हणाले?

छगन भुजबळ यांनी यावेळी तेलगी प्रकरणावरही प्रतिक्रिया दिली. “तेलगी प्रकरणात माझं नाव सीबीआयने देखील घेतलं नाही. तरीही शरद पवार यांनी मला उपमुख्यमंत्री आणि गृह मंत्रिपदाचा राजीनामा द्यायला लावला. पवारांनी राजीनामा घ्यायची घाई केली”, असं छगन भुजबळ म्हणाले.

“हे तेलगी प्रकरण दोन-तीन राज्यात होतं म्हणून मी सुप्रीम कोर्टात गेलो. तिथे सांगितलं की, ही केस सीबीआयकडे घ्या. ट्रकभर कागद आणले, पण त्यामध्ये छगन भुजबळ हे नाव कुठेही नव्हतं. मला सांगा, ज्या प्रकरणात सीबीआयनेदेखील माझं नाव घेतलं नाही त्या प्रकरणामुळे मला उपमुख्यमंत्री म्हणून राजीनामा द्यावा लागला. माझ्यावर शिक्का बसला की, हा तेलगी प्रकरणातील आहे म्हणून. मला शरद पवारांना सांगायचं आहे की, साहेब राजीनामा घेण्याची घाई तुम्ही केली”, असं छगन भुजबळ म्हणाले.