महाराष्ट्रात पुन्हा एकदा मराठी आणि अमराठी यांच्यातील वादाचा प्रकार समोर आला आहे. विशेष म्हणजे कल्याणमधील घटनेला जास्त काळ लोटला नसताना अशा प्रकारच्या दोन घटना समोर आल्याने खळबळ उडाली आहे. या घटनांची आता पोलीस दखल घेऊन काही कारवाई करतात का? ते पाहणं महत्त्वाचं आहे.
पनवेलमध्ये नेमकं काय घडलं?
पनवेलच्या भोकरपाडा परिसरात एका मराठी कुटुंबाला परप्रांतीयांनी सातत्याने त्रास दिल्याचा प्रकार समोर आला आहे. भाडेकरार संपल्याने परप्रांतीयांनी शिवीगाळ करत घर रिकामे करण्याची मागणी देखील केली. या पीडित कुटुंबाच्या मदतीसाठी मनसे पुढे सरसावली. मनसेच्या जिल्हाध्यक्षा आदिती सोनार यांच्यासह मनसे कार्यकर्ते मराठी कुटुंबाच्या मदतीला धावल्या. मनसेच्या इशाऱ्यानंतर त्रास देणाऱ्या परप्रांतीयांनी मराठी कुटुंबाची माफी मागितली आहे.
मनसे जिल्हाध्यक्षांनी दिला इशारा
मनसे जिल्हाध्यक्षा आदिती सोनार यांनी माध्यमांसमोर भूमिका मांडली. “मागच्या काही दिवसांपासून शर्मा नावाच्या सिक्रेटरीची सातत्याने तक्रार येत होती. एक तर परप्रांतीय, महाराष्ट्रात राहून आमच्या मराठी माणसाला त्रास दिला. तीन दिवसांपूर्वी शर्माने जातीवाचक शिवीगाळ केली. भाडे करारावर खोली असल्याने आमची खोली खाली करा, असं म्हणत अरेरावी केली. शिवीगाळ केली. तसेच पोलिसांना पैसे देवून तुम्हाला इथेच जमिनीवर गाडू, अशा प्रकारची भाषा शर्माकडून वापरण्यात आली. या परप्रांतीयांची एवढी मजल जातेच कशी? हे पाहण्यासाठी आम्ही इथे आलो होतो. त्याच्याकडून आम्ही माफी मागून घेतली आहे. महाराष्ट्रात राहून मराठी माणसाच्या नादी लागू नका”, असा इशारा मनसेच्या जिल्हाध्यक्षा आदिती सोनार यांनी दिला.
डोंबिवलीत मराठी विरुद्ध अमराठी असा वाद
विशेष म्हणजे डोंबिवलीतून अशीच एक धक्कादायक बातमी समोर आली आहे. डोंबिवलीच्या नांदिवली परिसरात मराठी आणि अमराठी असा वाद उफाळला. सोसायटीत सत्यनारायणची पूजा आणि हळदी-कुंकूच्या कार्यक्रमाला अमराठी नागरिकांनी विरोध केला. त्यामुळे हा वाद उफाळला आहे. याच मुद्द्यावरुन मराठी आणि अमराठी नागरिक हे आपापसात भिडले. अखेर हे प्रकरण पोलीस ठाण्यापर्यंत पोहोचलं.
या घटनेनंतर मराठी भाषिक महिलांनी माध्यमांना प्रतिक्रिया दिली. “आम्ही स्वखर्चाने हळदी कुकूंचा कार्यक्रम आयोजित करत होतो. सोसायटीकडे कोणत्याही प्रकारचा खर्च मागितला नव्हता. असं असतानादेखील संबंधित व्यक्तीकडून कार्यक्रमाला विरोध करण्यात आला. संबंधित अमराठी व्यक्तीने सोसायटीच्या व्हाट्स अॅप ग्रुपमध्ये सत्यनारायणाची पूजा आणि हळदी-कुंकूच्या कार्यक्रमाला विरोध केला. त्यानंतर आम्ही महिला सोसायटीच्या आवारात एकत्र जमलेल्या असताना त्या व्यक्तीने तिथे येऊन अर्वाच्य भाषेत शिवीगाळ केली. त्यातून हा वाद उफाळला. अखेर या प्रकरणी आम्ही पोलीस ठाण्यात तक्रार करायला आलो आहोत”, अशी प्रतिक्रिया संबंधित सोसायटीत राहणाऱ्या एका मराठी भाषिक महिलेने दिली.
लेखकाबद्दलअनिश बेंद्रेमहाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत | सामाजिक, राजकीय आणि मनोरंजनविषयक बातम्यांमध्ये नैपुण्य | क्राईम विषयाचा ‘मास्टरमाईंड’ | एबीपी माझा, टीव्ही९ मराठीसह पत्रकारिता क्षेत्रात 11 वर्षांहून अधिक अनुभव… आणखी वाचा