राष्ट्रवादीला रायगड हवे असेल, तर नाशिक आम्हाला द्या, अशी खेळी शिंदे गटाकडून खेळली जात आहे. दुसरीकडे रायगड शिवसेनेला देऊन राष्ट्रवादी नाशिक पदरात पाडून घेणार असल्याची चर्चा सुरू आहे. नाशिकमध्ये भुसेंना पालकमंत्रिपद देऊन गिरीश महाजन यांना कुंभमेळामंत्री आणि सहपालकमंत्री करण्यावरही सध्या महायुतीत खल सुरू आहे. राज्यात मुख्यमंत्री आणि उपमुख्यमंत्री यांच्या शपथविधीनंतर तब्बल तीन आठवड्यांनी मंत्रिमंडळाचा विस्तार झाला. त्यानंतर पालकमंत्रिपदे वाटपावरूनही महायुतीत मोठी रस्सीखेच पाहायला मिळाली. त्यामुळे तब्बल तीन आठवडे पालकमंत्रिपदांची घोषणाच झाली नाही.
Matheran Hill Tunnel: १६ महिन्यात काम फत्ते, माथेरानच्या हिरव्यागार डोंगरातून थेट बडोद्यासाठी वाट
मुख्यमंत्री देवेंद्र फडणवीस यांनी दाओस दौऱ्यावर जाण्यापूर्वी पालकमंत्रिपदांची यादी जाहीर केली असली, तरी या यादीवरून आता महायुतीत नाराजीनाट्य सुरू झाले आहे. महायुतीतील राज्यमंत्र्यांना पालकमंत्रिपद मिळाले असताना शिवसेना शिंदे गटातील ज्येष्ठ मंत्री तथा शालेय शिक्षणमंत्री दादा भुसे आणि आणि मंत्री भरत गोगावले यांना कोणत्याच जिल्ह्याचे पालकत्व देण्यात आले नसल्याने आश्चर्य व्यक्त केले जात आहे. भुसे यांना नाशिकचे, तर गोगावले यांनी रायगडचे पालकमंत्रिपद हवे होते. परंतु, फडणवीस यांनी रायगड येथे राष्ट्रवादीच्या अदिती तटकरेंची, तर नाशिक येथे गिरीश महाजन यांनी नियुक्ती केली. त्यामुळे शिंदे गटात नाराजीनाट्य सुरू होऊन वरिष्ठांनी आक्रमक पवित्रा घेतला. नाराज झालेले उपमुख्यमंत्री एकनाथ शिंदे यांनी थेट दरे गाव गाठले. त्यामुळे फडणवीस यांनी तातडीने नाशिक आणि रायगडच्या नियुक्तीला स्थगिती दिल्याने आता उलटसुलट चर्चांना उधाण आले आहे.
Maharashtra Politics: पालकमंत्रिपदाला स्थगिती; नाशिक, रायगडमधील नाराजीनंतर राज्य सरकारचा निर्णय
सहपालकमंत्रिपदावर खल
नाशिकमधून राज्य मंत्रिमंडळात तीन कॅबिनेट मंत्री असतानाही यापैकी एकालाही पालकमंत्रिपद न दिल्याने शिंदे गट आणि राष्ट्रवादीत नाराजी होती. त्यात गेल्यावेळेस नाशिकचे पालकमंत्री राहिलेले दादा भुसे हे शिवसेना शिंदे गटाचे ज्येष्ठ मंत्री असतानाही त्यांना नवीन सरकारमध्ये पालकमंत्रिपदापासून दूर ठेवण्यात आले. आपल्याला नाशिक मिळाले, तरच आपण पालकमंत्रिपद घेऊ, अशी भूमिका भुसेंनी घेतल्याचे समजते. मात्र, तरीही फडणवीस यांनी महाजन यांच्याकडे पालकमंत्रिपद दिल्याने हा घाव शिंदे गटाच्या जिव्हारी लागल्याची चर्चा आहे. त्यामुळे महाजन यांना कुंभमेळामंत्री ठेवून सहपालकमंत्रिपद द्यायचे आणि भुसेंकडे पालकमंत्रिपद द्यायचे, या पर्यायावरही आता महायुतीत खल केला जात आहे.

‘पालकमंत्री स्थानिक असावा’
नाशिक जिल्ह्यात राष्ट्रवादीचे सात आमदार असून, दोन मंत्री आहेत. त्यामुळे नाशिकच्या पालकमंत्रिपदावर राष्ट्रवादीने दावा केला होता. परंतु, कृषिमंत्री अॅड. माणिकराव कोकाटे यांना नंदुरबार, तर नरहरी झिरवाळ यांना हिंगोलीचे पालकमंत्रिपद देण्यात आलेले आहे. या निर्णयामुळे झिरवाळ आणि कोकाटे नाराज असल्याची चर्चा आहे. त्यामुळे स्थगितीनंतर राष्ट्रवादीचे मंत्री ॲड. कोकाटे यांनीही नाशिकच्या पालकमंत्रिपदावर दावा ठोकला आहे. नाशिकची आमची मागणी पूर्वीही होती आणि आताही आहे. पालकमंत्री स्थानिक असावा, ही एक गोष्ट महत्त्वाची आहे. दुसऱ्या जिल्ह्यात केवळ पाटी टाकायला जायचे, असे चांगले नाही, असे वक्तव्य करीत कोकाटे यांनी बाहेरील व्यक्तीला पालकमंत्रिपद देऊ नये, अशी मागणी केली आहे.
प्रेमविवाहाचा भयंकर शेवट! जळगावात ‘सैराट’ची पुनरावृत्ती, २६ वर्षीय तरुणाला निर्घृणपणे संपवलं
भाजपची झाली कोंडी
रायगडचे पालकमंत्रिपद राष्ट्रवादीला दिल्यास नाशिक शिवसेनेला द्या, अशी खेळी उपमुख्यमंत्री एकनाथ शिंदेंनी खेळल्याची चर्चा आहे. राष्ट्रवादीनेही रायगड शिवसेनेला दिल्यास नाशिक आम्हाला द्या, अशी भूमिका घेतली आहे. त्यामुळे नाशिक आणि रायगडवरून आता राष्ट्रवादी आणि शिवसेना शिंदे गटातच रस्सीखेच सुरू झाल्याने भाजपची कोंडी झाली आहे. राष्ट्रवादी आणि शिंदे गटाने आपला दावा कायम ठेवला, तर भाजपला नाशिकचे पालकमंत्रिपद गमवावे लागण्याची शक्यता आहे.