आरोपी शरीफुल इस्लाम शहजाद मोहम्मद रोहिल्ला आमीन फकीर याने भारतात पाऊल ठेवताच आपली ओळख बदलली होती. विजय दास या नावाने तो वावरत होता. सैफवर प्राणघातक हल्ल्याच्या आठवडापूर्वीचा ९ जानेवारीचा आरोपीचा बाईक चालवतानाचा सीसीटिव्ही फुटेज पोलिसांच्या हाती लागला आणि इथेच तो पोलिसांच्या जाळ्यात अडकला. पोलिसांनी सीसीटिव्हीच्या आधारे त्याचा ठावठिकाणा काढला आणि तांत्रिक माहितीच्या आधारे त्याची ओळखही पटवली.

पोलीस तपासात असे समोर आले की, शरीफुल हा बांग्लादेशमधील झलोकाटीचा रहिवासी असून तो मुंबईत सुमारे पाच महिन्यांपासून राहत होता आणि काही विचित्र ठिकाणी वेगवेगळी नोकरीही करत होता. यादरम्यान त्याने मुंबईमध्ये बाईक चालवली होती. हे दृश्य शहरातील सीसीटिव्ही कॅमेऱ्यांमध्ये कैद झाले होते. हे सीसीटिव्हीच पोलीस तपासात महत्वाचा धागा ठरला.

पण पुढे पोलिसांना आरोपीला शोधण्यासाठी मोठ्या आव्हानांना तोंड द्यावे लागले. शहरभरातील सीसीटिव्हीच्या आधारे आरोपीचा ठावठिकाणा शोधण्यासाठी पोलिसांना तासनतास कसरत करावी लागली. यातच शरीफुल ज्याच्याकडे काम करत होता त्या इसमाने पोलिसांना माहिती दिली की, त्याने शरीफुलला अंधेरी सबर्बन मध्ये बाईकवर स्वार होऊन जाताना पाहिले आणि हाच पोलीस तपासात महत्वाचा धागा ठरला.

त्यानंतर आणखी एक महत्वाचा पुरावा म्हणजे शरीफुलने वरळीतील एका फुड स्टॉलवर जेवणासाठी पेमेंट केले होते. यावरुनम तो ठाण्यापर्यंत गेल्याचे पोलिसांना समजले.