धुळे येथील सुरत बायपास रोडवर पथकाने खान्देश कॅन्सर सेंटर समोर बेकायदेशीरपणे वाहून नेण्यात येणारी विदेशी दारु व बिअरच्या बाटल्यांचा मोठा साठा हस्तगत केला. २० लाखाचा मुद्देमाल जप्त करत, वाहन चालकासह मालाचे मालक, खरेदीदार व पुरवठादारांचा चोरी वाहतुकीच्या आरोपात गुन्हा दाखल करण्यात आला आहे.
पथकाने दुपारी १२ वाजेच्या सुमारास सुरत बायपास रोडवरील खान्देश कॅन्सर सेंटर समोर महामार्गावर नाकाबंदी करीत वाहनांची तपासणी सुरू केली. संशयीत ट्रकला अडथळा निर्माण करून थांबविले. चालकाने त्याचे नावे विकाससिंग नगेंद्रसिंग चौहान (वय २६ रा. रूम नं.१३, धर्मेशभाईको चाळ, भिमपौर, दमण) असे सांगितले. त्याने ट्रकमधून कमिन्स कंपनीचे पॉवर जनरेटर गुजरात राज्यात घेवून जात असल्याचे सांगुन दिशाभुल करणारी माहिती दिली. मात्र पथकाने बारकाईने जनरेटरची तपासणी केली असता, जनरेटरमध्ये दारूसाठा मिळून आला. एकुण ४ लाख १७ रूपये किंमतीची विदेशी दारु, रम व बिअर आणि १२ लाखांचा ट्रक असा एकुण १६ लाख १७ हजार ६०० रूपये किंमतीचा मुद्देमाल जप्त करण्यात आला. ही विदेशी दारु विक्रीबाबत दादरा नगर हवेली प्रशासनाचे फॉर सेल इन यु.टी ऑफ दादरा नगर हवेली अण्ड दमण अण्ड दिव ओन्ली, निर्देश असतांनाही महाराष्ट्र राज्यात वाहतूकीचा किंवा पुरवठा करण्याचा परवाना नसतांना शासनाचा कर बुडवून शासनाची फसवणूक करून महाराष्ट्र राज्यात विक्री करण्याचा उद्देशाने मालाचे मालक, खरेदीदार व पुरवठादार यांचे संगनमताने बेकायदेशीररित्या चोरटी वाहतूक करतांना ट्रकचालक मिळून आला. याप्रकरणी शहर पोलिसात गुन्हा दाखल करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक किशोर काळे यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्रीराम पवार, असई. संजय पाटील, पोहेकॉ. पंकज खैरमोडे, पवन गवळी, आरीफ पठाण, शशिकांत देवरे, मुकेश वाघ, पोकाँ. मयुर पाटील, सुशिल शेंडे, राहुल गिरी, हर्षल चौधरी यांच्या पथकाने केली.
लेखकाबद्दलअजय गर्दे महाराष्ट्र टाइम्स ऑनलाईनमध्ये धुळे जिल्ह्यात फ्रिलान्सर प्रतिनिधी म्हणून कार्यरत. 8 वर्षांपूर्वी वृत्तवाहिनीतून पत्रकारितेची सुरुवात. आवाज Tv चॅनल, सोबत मटा ऑनलाईनपर्यंत वाटचाल… आणखी वाचा