डीसीपींनी दिलेल्या माहितीनुसार, एका अज्ञात व्यक्तीने करीना कपूरची घरकाम करणारी अरियामा फिलिप्स उर्फ लीमा हिला पकडले होते. त्यामुळे ती जोरजोरात ओरडू लागली. रात्री २ वाजण्याच्या सुमारास हा व्यक्ती जेह याच्या खोलीत शिरला होता. मोलकरणीचा आरडाओरडा ऐकून सैफ अली खान आला तेव्हा त्या व्यक्तीने त्याच्यावर धारदार शस्त्राने हल्ला केला. हल्ल्यानंतर हा व्यक्ती पळून गेला. सैफ अली खानच्या शरीरावर सहा ठिकाणी वार करण्यात आले आहेत.

अज्ञात हल्लेखोर ज्यावेळी घरी आला तेव्हा सैफ अली खान त्याची दोन मुले तैमूर आणि जेहसोबत घरी उपस्थित होता. करीना कपूर खान तिच्या मैत्रिणींसोबत पार्टी करत होती. सैफ अली खान आणि करीना कपूर यांच्या घरातील सर्व कर्मचारी आणि मोलकरणी संशयाच्या भोवऱ्यात आहेत. पोलिसांनी या सर्वांना ताब्यात घेतले आहे. सैफ त्याच्या कुटुंबासह इमारतीच्या वरच्या मजल्यावर राहतो. एवढी कडेकोट सुरक्षा असतानाही कोणीतरी अज्ञात व्यक्ती सैफच्या घरात घुसली कशी? असा प्रश्न आता उपस्थित झाला आहे.

सीसीटीव्ही फुटेजची तपासणी
मुंबई गुन्हे शाखेच्या पथकानेही आता तपास सुरू केला आहे. स्थानिक पोलिसांनी सैफ अली खानच्या घरातील सर्व सीसीटीव्ही फुटेजचा डीव्हीआर तपासासाठी ताब्यात घेतला आहे. गुन्हे शाखा सैफ अली खानच्या घराभोवतीचे सर्व सीसीटीव्ही फुटेज आणि रस्त्याचे फुटेज तपासत आहे.