पोलिसांच्या माहितीनुसार, रियान याचे वडील रियाज हे व्यापारी असून ते दक्षिण आफ्रिकेत राहतात. सोमवारी सकाळी रियानचे वर्गमित्र शाळेत गेले. रियान खोलीत एकटाच होता. सकाळी ११ वाजताच्या सुमारास तो चवथ्या माळ्यावर गेला. तेथील पाण्याच्या टाकीजवळून त्याने उडी घेतली. आवाजाने चौकीदार बाहेर आला. त्याला रियान रक्ताच्या थारोळ्यात पडलेला दिसला. त्याने वॉर्डनला माहिती दिली. वॉर्डनने रियानला खासगी हॉस्पिटलमध्ये दाखल केले. डॉक्टरांनी तपासून त्याला मृत घोषित केले. घटनेची माहिती मिळताच वरिष्ठ पोलिस निरीक्षक महेश चव्हाण यांच्यासह पोलिसांचा ताफा तेथे पोहोचला. पोलिसांनी रियानचा मोबाइल जप्त केला. तो लॉक आहे. पोलिसांनी त्याच्या नातेवाइकांना माहिती दिली. रियानच्या आत्महत्येने त्याच्या आईला जबर धक्का बसला आहे. ती धायमोकलून रडू लागली. बारावीची परीक्षा असल्याने अभ्यास न झाल्यामुळे तो काही दिवसांपासून तणावात होता, असे समजत आहे. याप्रकरणी एमआयडीसी पोलिसांनी आकस्मिक मृत्यूची नोंद केली असून पुढील तपास सुरू केला आहे.

तीन दिवसांपूर्वीही नांदेडातूनही १६ वर्षाच्या आत्महत्येची मन हेलावून टाकणारी घटना समोर आली होती. मोबाईलच्या याच हट्टापायी १६ वर्षीय मुलाने गळफास घेऊन आपलं आयुष्य संपवलं. मुलाचा मृतदेह लटकलेल्या अवस्थेत पाहून वडिलांनीही तेच दोरखंड सोडले आणि त्याच दोरखंडाने स्वतः गळफास घेऊन जीवन संपवले. या घटनेने सारेच हादरले आहेत.