Satara Young Woman Died In Accident: साताऱ्यात झालेल्या भीषण अपघातात एका तरुणीचा हृदयद्रावक अंत झाला आहे. महाबळेश्वरला फिरायला जात असताना हा भीषण अपघात झाला आहे.
आयटी कंपनीतील काही जण महाबळेश्वरसाठी निघाले होते
याप्रकरणी पोलिसांनी सांगितले की, पुण्यातील नामांकित आयटी कंपनीत कार्यरत तीन तरुण आणि एक तरुणी महाबळेश्वरला फिरण्यासाठी दुचाकीवरून (एमएच ०१ डीजे ८३६५) निघाले होते. हे सर्वजण खंडाळा तालुक्यातील शिंदेवाडी गावाजवळ नीरा नदी पुलावर आले असता भरधाव ट्रकने (पीबी ०६ एयु ९९९५) त्यांच्यातील एका दुचाकीला जोरदार धडक दिली. या धडकेत रुबेल सिन्हा (वय २४) रस्त्यावर पडली आणि पाठीमागून येणारा ट्रक तिच्या शरीरावरून गेल्यामुळे तिचा जागीच मृत्यू झाला. या घटनेत दुचाकी चालवणारा तरुण गंभीर जखमी असून, त्याला शिरवळ येथील खासगी रुग्णालयात उपचारासाठी दाखल करण्यात आले आहे.
महामार्गावर काही काळ वाहतूक कोंडी
या घटनेची माहिती मिळताच शिरवळ पोलीस ठाण्याचे पोलीस निरीक्षक संदीप जगताप, विलास यादव, पोलीस हवालदार अरविंद बाराळे आणि भाऊसाहेब दिघे यांनी घटनास्थळी धाव घेतली. त्यांनी महामार्गावर वाहतूक कोंडी सुरळीत करत जखमींना तातडीने रुग्णालयात दाखल केले. रुबेल सिन्हा हिच्या कमी वयात मृत्यू झाल्याने तिच्या कुटुंबीयांवर दुःखाचा डोंगर कोसळला आहे.
या अपघातानंतर महामार्गावर वाहतूक कोंडी निर्माण झाली होती. काही वेळात साताऱ्याकडे जाणारी वाहतूक कोंडी पोलिसांनी सुरळीत केली. या घटनेमुळे अवजड वाहनांच्या वेगावर नियंत्रण ठेवण्याची गरज अधोरेखित झाली आहे.
ट्रक चालकावर गुन्हा दाखल
या प्रकरणी शिरवळ पोलिसांनी घटनेचा तपास सुरू केला असून, ट्रकचालकावर गुन्हा दाखल करण्याची प्रक्रिया सुरू आहे. या अपघातानंतर पोलीस निरीक्षक संदीप जगताप यांनी जखमींना धीर देऊन परिस्थिती नियंत्रणात आणली आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा