गेली २२ वर्षे कृषी क्षेत्रात कार्यरत असलेल्या डॉ. अण्णा आजगावकर यांचा हा स्वत:चा प्रयोग असून ही जात विकसित करण्यासाठी त्यांना सुमारे सहा वर्षे इतका कालावधी लागला. सध्या हे झाड नऊ महिने वयाचे असून याचे आयुष्य सुमारे दीड वर्षे जगण्याची शक्यता आहे. या झाडावर १५० इतकी फळे असून पुढील कालावधीत ४०० ते ५०० फळे लागतील, असा विश्वास त्यांनी व्यक्त केला.

वेंगुर्ले तालुक्यातील आडेली गोपीनाथवाडी येथील रहिवासी डॉ. अनंत (अण्णा ) दिगंबर प्रभू आजगावकर यांनी लाल भेंडीचे झाड १७ फूट १० इंच इतके उंच विकसित करून नवीन विक्रम रचला आहे. कृषी क्षेत्रातील या विक्रमाची ‘वर्ल्ड वाईड बुक ऑफ रेकॉर्ड’ (worldwide Book Of Record) मध्ये नोंद झाली आहे. त्यांच्या या कामगिरीबद्दल त्यांचे कृषी क्षेत्रातून , तालुक्यासह सर्व स्तरातून अभिनंदन व कौतुक होत आहे.

या लाल जातीच्या भेंडीच्या बियापासून लागवड होत नाही. यासाठी त्यांनी सहा वर्षे कठोर परिश्रम घेऊन हे भेंडीचे झाड विकसित केले. या भेंडीचे झाड, डोळे व कलम पद्धत वापरून विकसित करण्यात आले आहे. पुढील कालावधीत २१ ते २२ फुटापर्यंत झाड विकसित करून आणखी विक्रम करण्याचा मानस डॉ. अण्णा आजगावकर यांनी व्यक्त केला आहे. तर आपणास कृषी क्षेत्रात आडेली ग्रामस्थांचे तसेच आजगाव येथील कुटुंबीय ,ग्रामस्थ यांचेही सहकार्य लाभल्याचे ते सांगतात.

आजगाव येथील मूळ रहिवासी असलेल्या अण्णा आजगावकर आपली पारंपारिक शेती , आंबा , काजू , नारळ बागायती असून त्यामुळे कृषी क्षेत्रात विविध नावीन्यपूर्ण उपक्रम राबविण्याची आवड निर्माण झाली , असे सांगतात. कृषी क्षेत्रातील शिक्षण पूर्ण केल्यानंतर आपण गेली २२ वर्षे कृषी क्षेत्रात कार्यरत असून आपणास माजी मंत्री तथा माजी पालकमंत्री आ. रवींद्र चव्हाण यांचे मोलाचे सहकार्य , सपोर्ट व वेळोवेळी प्रोत्साहन मिळाल्याने आपण ‘ वर्ल्ड वाईड बुक ऑफ रेकॉर्ड’ मध्ये पात्र ठरू शकलो, असे यावेळी त्यांनी बोलताना सांगितले. कृषी क्षेत्रातील नाविन्यपूर्ण प्रयोग यामुळे त्यांना अमेरिकन विद्यापीठाची पीएचडी ही पदवी मिळाली आहे. गेली सहा ते सात वर्षे आताच प्रयत्न नंतर त्यांनाही नवीन लाल भेंडीची जात विकसित करण्यात यश आली असून यासाठी आवश्यक ती पुढील तांत्रिक प्रक्रिया आता लवकरच करणार असल्याचेही त्यांनी यावेळी सांगितलं.