HMPV Case In Nagpur: नागपुरात एचएमपीव्हीचे दोन रुग्ण आढळून आल्याने एकच खळबळ उडाली आहे. दोन लहान मुलांची चाचणी पॉझिटिव्ह आली आहे.
दोन्ही मुलांना खोकला आणि ताप
मिळालेल्या माहितीनुसार, या दोन्ही मुलांना खोकला आणि ताप होता. मात्र, दोन्ही मुलांना रुग्णालयात भरती करुन घेण्याची गरज भासली नाही. या दोघांनाही घरीच उपचार देण्यात आल्याची माहिती आहे. दोन्ही मुलांची प्रकृती आता सुधारल्याची माहिती आहे.
सोमवारी एचएमपीव्हीची सात प्रकरणं नोंदवली
भारतात सोमवारी (६ जानेवारी) मुलांमध्ये मानवी एचएमपीव्ही संसर्गाची सात प्रकरणं नोंदवली गेली आहेत. चीनमध्ये श्वसनाच्या आजारांमध्ये वाढ होत असताना – बेंगळुरू, नागपूर आणि तामिळनाडूमध्ये प्रत्येकी दोन आणि अहमदाबादमध्ये एक रुग्ण आढळून आला आहे. याबाबत केंद्रीय आरोग्य मंत्री जे पी नड्डा यांनी सांगितले की प्रकरणांमध्ये वाढ झाल्यामुळे कोविड सारखा उद्रेक होणार नाही.
एचएमपीव्ही हा नवीन विषाणू नाही – जेपी नड्डा
“एचएमपीव्ही हा नवीन विषाणू नाही. तो २००१ मध्ये पहिल्यांदा ओळखला गेला आणि तो अनेक वर्षांपासून जगभरात पसरत आहे”, असं नड्डा म्हणाले.
राजस्थानमधील डुंगरपूर येथील एका दोन महिन्यांच्या बालकाला २४ डिसेंबर रोजी अहमदाबादमधील एका खाजगी रुग्णालयात श्वसनाच्या आजाराने दाखल करण्यात आले होते आणि २६ डिसेंबर रोजी एचएमपीव्हीचे निदान झाले होते. नागपुरातील मेडिट्रिना इन्स्टिट्यूट ऑफ मेडिकल सायन्सेसमध्ये ७ वर्षांचा मुलगा आणि १३ वर्षांची मुलगी अशा दोघांची चाचणी पॉझिटिव्ह आली होती.
रुग्णालयाने प्रकरणे नोंदवली असली तरी, नागपूर महानगरपालिकेने एम्स नागपूर येथे नमुने पुन्हा तपासण्याचा निर्णय घेतला आहे. सोमवारी ICMR व्हिडिओ कॉन्फरन्समध्ये या प्रकरणांवर चर्चा करण्यात आल्याची माहिती आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा