काय आहे प्रकरण?

धाराशिव जिल्ह्यात वाशी तालुक्यातील बावी पिडी येथे पारधी समाजाच्या दोन गटात हाणामारीची हादरवणारी घटना घडली. शेतात पाणी देण्याच्या तात्कालीक कारणावरुन दोन गटात वाद झाला. हे दोन्ही गट एकमेकांच्या परिचयाचे होते. त्यामुळे पूर्ववैमनस्यातून हा प्रकार घडल्याचा संशय व्यक्त केला जात आहे.

शेतात पाणी देण्यावरुन वाद

यामध्ये चौघा जणांना आपले प्राण गमवावे लागले आहेत. मृतांमध्ये तीन पुरुष आणि एका महिलेचा समावेश आहे. रविवारी मध्यरात्रीच्या सुमारास पारधी समाजात आपसात वादाला सुरुवात झाली. शेतात पाणी देणं हा तत्कालीन वाद असला तरी दोन्ही गट एकमेकांच्या परिचयाचे असल्याने पूर्ववैमनस्याचा संशय व्यक्त केला जात आहे.

दोन्ही गटातील वाद इतका विकोपाला गेला, की त्याचे हाणामारीत पर्यवसन झाले. यामध्ये चौघा जणांना जीव गमवावा लागला आहे. मृतांमध्ये तीन पुरुष आणि एक महिला आहे. तर तिघे जण जखमी झाले आहेत.

दहा जण ताब्यात

दोन गटातील राड्याप्रकरणी दहा जणांना पोलिसांनी संशयित म्हणून ताब्यात घेतले आहे. या घटनेने परिसरात घबराट पसरली आहे. पोलीस या प्रकरणाचा अधिक तपास करत आहेत. जुन्या वादातून हा गंभीर प्रकार घडल्याचा प्राथमिक अनुमान आहे.

मिरा रोडमधील सूत्रधार अटकेत

दुसरीकडे, मिरा रोडमध्ये एका तरुणाची गोळ्या घालून हत्या करण्यात आल्याच्या प्रकरणातील मुख्य सूत्रधार असणाऱ्या दोघांना अटक करण्यात आली आहे. मात्र हल्लेखोर अद्याप फरार असून, त्याचा शोध पोलिस घेत आहेत. ही हत्या पूर्ववैमनस्यातून सुपारी देऊन घडवून आणल्याचे पोलिसांच्या प्राथमिक तपासात समोर आले आहे.

मिरा रोड स्थानकाला लागून असणाऱ्या शांती शॉपिंग सेंटरमध्ये ३५ वर्षीय शम्स अन्सारी उर्फ सोनूवर अज्ञात व्यक्तीने शुक्रवारी रात्री गोळीबार करुन पळ काढला होता. यात शम्सचा जागीच मृत्यू झाला. या प्रकरणाच्या तपासासाठी मिरा-भाईंदर पोलिसांची विशेष पथके तैनात करण्यात आली. त्यांनी तांत्रिक माहितीच्या आधारे नालासोपारा येथून २२ वर्षीय सैफअली खानला शनिवारी अटक केली.