विशाल धनवडे यांनी फेसबुक पोस्ट लिहून आपल्या राजीनाम्याचे कारण विशद केले आहे. त्यांनी लिहिले, सप्रेम जय महाराष्ट्र, आजच्या या पत्रास कारण की या नवीन वर्षात मी एक निर्णय घेतला आहे. या निर्णयात आपली भूमिका महत्वाची आहे. काही निर्णय घेताना त्रास होतो तसा मला ही झालाय. मागील एक महिन्यापासून झोप नाही, बीपीची गोळी सुरु आहे. परंतु आता निर्णय झाला आहे. त्यामुळे बाळासाहेब ठाकरे म्हणतात तसं एकदा निर्णय घेतला की घेतला परत मागे नाही फिरायचे नाही, तसे झाले आहे. मी कधी माझ्या स्वप्नात ही विचार केला नाही की माझी शिवसेना मला सोडावी लागेल. ज्या शिवसेनेवर मी एवढं प्रेम केलं, ती वाढवण्यासाठी एवढे कष्ट घेतले. ज्या शिवसेनेने मला एवढे प्रेम दिले, नाव दिले, मोठे केले ती शिवसेना सोडताना खूप त्रास होत आहे. माझी शिवसेना, माझे उद्धव साहेब, आदित्य साहेब यांच्याबद्दल मला खूप आदर आणि प्रेम आहे त्यांच्याबद्दल कोणतीही तक्रार नाही. परंतु पुण्यातील शिवसेनेला कोणीही वाली नाही इथे जिल्ह्यात पक्षालाच शिवसेना नकोय, असे वाटायला लागले आणि यातूनच घुसमट चालू झाली आहे. ना पुण्यात लोकसभेला जागा, ना ही विधानसभेला आणि जागा मिळाली तरीही त्या उमेदवाराच्या मागे कोणतीही ताकद द्यायची नाही कोणतीही रसद पुरवायची नाही.
Pune News : मटा इम्पॅक्ट! बारामतीत १८ ‘आजारी’ रूग्णवाहिकांवर कारवाई, नेमकं काय कारण?
यासोबतच बाळा ओसवाल यांनीही शिवसेनेतील कार्यपद्धतीवर नाराजी व्यक्त केली आहे. त्यामुळेच आपण शिवसेनेला जय महाराष्ट्र करतोय असे ओसवालांनी म्हटले आहे. प्रिय शिवसैनिकांनो तुम्हाला वाईट वाटेल पण माझा निर्णय पक्का आहे, असं म्हणत ओसवाल यांनी पक्ष सोडला आहे. विशाल धनवडेंसह बाळा ओसवाल आणि पल्लवी जावळे यांच्यासह आणखी दोन माजी नगरसेवक भाजपात प्रवेश करणार असल्याची माहिती मिळतेय. या सर्वांचा ५ जानेवारीला पक्षप्रवेश पार पडणार आहे.