नववर्षानिमित्त अक्कलकोटवरून गाणपुरला जात असलेल्या कुटुंबाच्या कारला सोलापूर धुळे महामार्गावरील महाकाळाजवळ भीषण अपघात झाला आहे. महामार्गावर उभे असलेल्या ट्रकला बीडकडून संभाजीनगरकडे जाणाऱ्या कारने पाठीमागून जोरात धडक दिली आणि होत्याचे नव्हते झाले. चार जणांचा जागीच दुर्दैवी अंत झाला. तर अपघातात जखमी झालेल्या दोघांना छत्रपती संभाजीनगर येथील रुग्णालयात उपचारासाठी पाठवण्यात आले आहे. या अपघाताची माहिती मिळताच घटनास्थळी गोंदी पोलिसांनी धाव घेतली व क्रेनच्या साहाय्याने ती गाडी बाजूला केली. त्याचबरोबर मृत्यू झालेल्यांना देखील बाहेर काढण्यात आले. जखमींना पुढील उपचारासाठी छत्रपती संभाजीनगर येथील सरकारी रुग्णालयात दाखल करण्यात आले आहे.

नववर्षाच्या पहिल्याच दिवशी झालेला हा एकमेव अपघात नसून सोलापूरातही अशीच दुर्दैवी घटना घडली आहे. देवदर्शनासाठी जाणाऱ्या भाविकांवर काळाने घाला घातला आहे. या भीषण अपघातात ४ भाविकांचा जागीच मृत्यू झाला आहे. तर ७ ते ८ जण गंभीर जखमी झाले आहेत. जखमींना अक्कलकोट ग्रामीण स्थानिक रुग्णालयात दाखल करण्यात आले आहे. कुटुंबाने अक्कलकोट येथील स्वामी समर्थ आणि गणगापूर येथील श्री दत्तच्या मंदिरांना भेट द्यायचे ठरवले होते. त्यानुसार ते नांदेडमधून सोलापूरला आले. त्यांनी अक्कलकोटला जाऊन श्री स्वामी समर्थांचे दर्शन घेतले. त्यानंतर ते स्कॉर्पिओ कारने गणगापूरच्या दिशेने जात होते. वाटेतच त्यांचा अपघात घडला.