Manoj Jarange Patil : न्यायालयीन कोठडी दरम्यान मृत्युमुखी पडलेल्या सोमनाथ सूर्यवंशी याच्या कुटुंबीयांना आपण न्याय द्यावा. लवकरात लवकर न्याय नाही केला तर जनता स्वतः या प्रकरणात न्याय करेल आणि तुम्हाला ते परवडणारे नाही, असा मनोज जरांगे पाटलांनी इशारा दिला आहे.
परभणीत झालेल्या दंगलीनंतर न्यायालयीन कोठडी दरम्यान सोमनाथ सूर्यवंशी या युवकाचा मृत्यू झाला. आणि त्याचे पडसाद संपूर्ण राज्यभर उमटत आहेत. सोमनाथ सूर्यवंशी व विजय वाकोडे यांच्या कुटुंबीयांची आज मनोज जरांगे पाटील यांनी भेट घेतली. यावेळी सूर्यवंशी आणि वाकोडे कुटुंबीयांकडून त्यांनी घटनाक्रम जाणून घेतला. त्यानंतर त्यांनी माध्यमांशी संवाद साधला. 
Rahul Gandhi: सोमनाथ सूर्यवंशी दलित, संविधानाचं रक्षण करत होता, पोलिसांनी त्याला मारलं, राहुल गांधींचे गंभीर आरोप
मनोज जरांगे पाटील म्हणाले, परभणीमध्ये घडलेला प्रकार अत्यंत दुर्दैवी आहे. मिळालेल्या माहितीनुसार सोमनाथ सूर्यवंशी याला पोलिसांनी प्रचंड मारहाण केली. पोस्टमार्टम रिपोर्टमध्ये मारहाण केल्याचे स्पष्ट झाले आहे तो रिपोर्ट देखील कुटुंबीयांनी मला दाखवला. राज्याच्या मुख्यमंत्र्यांनी या बाबीची गंभीर दखल घेऊन यामध्ये जे दोषी असतील त्या पोलीस कर्मचाऱ्यांवर कारवाई देखील करावी. सोमनाथ सूर्यवंशी यांच्या कुटुंबीयांना न्याय द्यावा. यामध्ये आरोपी आमदार असो की खासदार असो की मंत्री असो तो गजाआड गेला पाहिजे, अशी कुटुंबीयांची मागणी आहे आणि ती पूर्ण झालीच पाहिजे.
परभणी प्रमाणेच बीडच्या मस्साजोगमध्ये संतोष देशमुख याचा देखील अमानुषपणे खून करण्यात आला, त्याच्याही कुटुंबीयांना न्याय मिळाला पाहिजे. मयत संतोष देशमुख यांच्या मुलीने २८ डिसेंबर रोजी बीड येथे भव्य अशा मोर्चाचे आयोजन केले आहे. या मोर्चामध्ये सर्वच पक्षातील नेत्यांनी सहभागी व्हावे, कोणत्याही प्रकारचे राजकारण करू नये, असेही मनोज जरांगे पाटील म्हणाले.
यासोबतच, सरकारने जर या प्रकरणात आरोपींना पाठीशी घालण्याचा प्रयत्न केला तर मी स्वतः खबरदारी घेणार आहे. संतोष देशमुख मृत्यू प्रकरण असो की सोमनाथ सूर्यवंशी या दोन्ही प्रकरणांमध्ये जे कोणी दोषी असतील त्यांना सुट्टी मिळू देणार नाही, असेही जरांगेंनी नमूद केले. तर ‘आरोपींना जोपर्यंत ताब्यात घेणार नाही तोपर्यंत हा लढा सुरूच राहणार आहे. या प्रकरणात आरोपींना पाठीशी घालण्याचे काम सरकारकडून केले जात आहे. त्यामुळे गृहमंत्री व मुख्यमंत्र्यांनी या प्रकरणाची गंभीर दखल घेऊन आरोपींना तात्काळ अटक करावी,’ अशी मागणी देखील जरांगे पाटलांनी केली आहे.
‘सरकारने शिंदे समितीला एक वर्षाची मुदतवाढ द्यावी’
मराठा समाजाला कुणबी प्रमाणपत्र मिळण्यास अडचण होऊ नये यासाठी सरकारने शिंदे समितीची स्थापना केली आहे. या शिंदे समितीचा कार्यकाळात संपला असून त्या समितीला पुन्हा एकदा एक वर्षाची मुदतवाढ द्यावी अशी मागणी आम्ही सरकारकडे केली आहे. त्याचबरोबर कुणबी प्रमाणपत्र मिळण्यासाठी जर कोणी अडचण निर्माण करत असेल तर त्याची देखील आम्ही गय केली करणार नाहीत. कुणबी प्रमाणपत्रासाठी कोणी पैसे मागत असेल तर तसेही मला कळवा असे म्हणून जरांगे पाटील म्हणाले.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा