हेमंत रघुनाथ परांजपे (६४) असे हल्ल्यात जखमी झालेल्या कार्यकर्त्याचे नाव असून ते सेवानिवृत्त आहेत. हेमंत हे कल्याणमधील भाजपचे ज्येष्ठ कार्यकर्ते आहेत. या घटनेनंतर भाजपा कल्याण विभागाच्या कार्यकर्त्यांनी तीव्र संताप व्यक्त करत हल्लेखोरांना तात्काळ अटक करण्याची मागणी केली आहे.

हेमंत परांजपे यांनी या संदर्भात बाजारपेठ पोलिसांना दिलेल्या जबाबानुसार, शुक्रवारी रात्री आपण महेश जाधव यांच्या नातेवाईकाच्या लग्नाला गेलो होतो. तेथून प्रशांत देशमुख यांनी त्यांच्या कारने आपणास दोन जणांना आपल्याला पारनाका येथील घरी सोडण्यास सांगितले. शुक्रवारी रात्री बारा वाजण्याच्या सुमारास आपण घराजवळ उतरलो. तेथेच उभा असताना चेहऱ्यावर रूमाल लावून अचानक दोन जण तेथे स्कूटरवरून आले. काय रे लय माजलास काय… आमच्या दादाला शिव्या देतो काय… त्यांना काही पण बोलतोस काय… अशी दमदाटी करत दोघांनी आपणास शिवीगाळ केली. ठोसा-बुक्क्यांनी मारहाण करत जमिनीवर पाडले. लाथा-बुक्क्यांनी मारहाण करत सिमेंटचे पेव्हर ब्लाॅक मारून पायाला दुखापत केली.

यावेळी आपण बचावासाठी वाचवा-वाचवा ओरडल्याने मारेकरी तेथून पळून गेले. हे दोन्ही हल्लेखोर २५ ते ३० वयोगटातील होते. शनिवारी सकाळी हेमंत परांजपे यांनी बाजारपेठ पोलिसांना जबाब दिला. पोलिसांनी गुन्हा नोंदवून हल्लेखोरांना हुडकून काढण्यासाठी तपासचक्रांना वेग दिला आहे.

हा हल्ला भाजपाच्या कार्यकर्त्यांवर नाही तर भाजपावर झाला आहे. या हल्ल्याचा सूत्रधार कोण? या प्रकरणातील आरोपींची सीसीटीव्ही फुटेजमधून ओळख पटवून त्यांना येत्या १२ तासांच्या आत अटक करावी. अन्यथा भाजपातर्फे उग्र आंदोलन केले जाईल. भाजपाच्या कोणत्याही कार्यकर्त्याकडे कुणी तिरप्या नजरेने पाहिल्यास त्याला जशास तसे उत्तर दिले जाईल, असा इशारा भाजपाचे कल्याण शहराध्यक्ष वरूण पाटील यांनी या पार्श्वभूमीवर बोलताना दिला.