नालासोपारा येथे राहणारा गौतम गुप्ता (वय 25) याचे 12 डिसेंबर रोजी लग्न होते. गौतम याच्या लग्नात सहभागी होण्यासाठी उत्तर प्रदेशातील गाजीपुर जिल्ह्यातून त्याची मावशी रामलता देवी गुप्ता (वय 55) नालासोपारा येथे आल्या होत्या.लग्नकार्य उत्साहात पार पडले. त्यानंतर गौतम, त्याची मावशी रामलाता देवी व बहिण निमता देवी गुप्ता (वय 30) या दोघींना फिरण्यासाठी गेटवे ऑफ इंडिया व एलिफंटा परिसरात गेला होता.
गौतम, त्याची मावशी व बहिण असे हे तीघेजण दुपारी तीन वाजताच्या सुमारास बोटीत बसले. त्याचवेळी स्पीड बोट, हे तिघेही असलेल्या प्रवासी बोटीला धडकली व भीषण असा अपघात घडला.

स्पीड बोट धडकल्यानंतर प्रवाशांनी एकापाठोपाठ एक लाईफ जॅकेट घालण्यास सुरुवात केली. गौतमने घाईघाईत प्रथम बहिणीला आणि मावशीला लाईफ जॅकेट दिले त्याचप्रमाणे इतरांनाही लाईफ जॅकेट दिले. एकमेकांचे प्राण वाचवण्यासाठी सुरू असलेल्या या भयानक परिस्थितीत त्याची मावशी त्याच्यापासून वेगळी झाली. गौतम बहिणीला घेऊन दुसऱ्या बोटी जवळ गेला व बोटीतील इतर दोघांनाही वर खेचून घेतले. मावशीने लाईफ जॅकेट घातले असल्याने तिचा जीव वाचणारच अशा मनस्थितीत गौतम होता. मात्र गौतमची मावशी रामलता देवी त्याच्यापासून दूर झाली ती कायमचीच. रामलता देवी यांचा बोट दुर्घटनेत दुर्दैवी अंत झाला.

भाच्याचे लग्न आनंदात पार पाडून मावशीला मुंबई फिरवण्यासाठी घेऊन गेलेल्या गौतमला स्वप्नातही वाटले नव्हते की इतक्या दुर्दैवी घटनेला त्यास सामोरे जावे लागेल. बहिणीला वाचवले मात्र मावशीला वाचवू शकलो नाही याची खंत गौतमला सतावत आहे. रामलता देवी यांच्या मृत्यूमुळे गौतम व त्यांच्या कुटुंबीयांवर दुःखाचा मोठा डोंगर कोसळला आहे.