महायुती सरकारमध्ये यावेळी मंत्रिमंडळात अनेक नवीन प्रॉमिसिंग चेहऱ्यांना संधी देताना काही अनुभवी, मातब्बर नेत्यांना वगळण्यात आल्याने महाराष्ट्राच्या राजकारणात गेल्या २-३ दिवसांपासून नाराजीनाट्य सुरु आहे. भाजपा, शिवसेना आणि राष्ट्रवादी काँग्रेस तीनही पक्षातील नेत्यांनी उघडपणे नाराजी बोलून दाखवली आहे. सुधीर मुनगंटीवार, संजय कुटे, छगन भुजबळ, तानाजी सावंत, नरेंद्र भोंडेकर यांच्यासह इतरांनी नाराजी व्यक्त केली आहे. त्यामुळे निवडणुकीपूर्वी एकसंध असणाऱ्या महायुतीमध्ये आता मंत्रिमंडळ आणि खातेवाटपावरून भूकंप होतो का? याकडे सर्वांचं लक्ष लागले आहे. परंतु या नाराजीनाट्याला एक अपवाद ठरले आहेत, ते म्हणजे देवेंद्र फडणवीस यांचे राइट हँड म्हणून ओळखले जाणारे रविंद्र चव्हाण.
कोकणात मंत्रीपद पाच; भाईंच्या शिलेदारांना मोठी आस, खातीही मिळणार का खास?
रविंद्र चव्हाणांनी आपल्या कामगिरीमुळे त्यांनी संघटनेत मानाचे स्थान मिळवले आहे. विधानसभा निवडणुकीत महायुतीच्या ऐतिहासिक विजयात देवेंद्र फडणवीस यांच्या खालोखाल रवींद्र चव्हाण यांचे योगदान असल्याचीही चर्चा झाली. मुख्यमंत्रीपदासाठी देवेंद्र फडणवीस यांच्यासह भाजपमधील चर्चेत असलेल्या नावांमध्ये चव्हाण यांचे नाव आघाडीवर होते. मुख्यमंत्रीपदी फडणवीस निश्चित झाल्यानंतर त्यांच्या कॅबिनेट मधील एक प्रमुख नाव म्हणून रविंद्र चव्हाण यांच्याकडे पाहिले जात असताना त्यांना मंत्रिमंडळात स्थान देण्यात आले नाही. तरीही चव्हाण यांच्याकडून कुठल्याही प्रकारे नाराजीचा सूर उमटलेला नाही.

नागपूर येथील विधानभवन परिसर, भाजपा विधीमंडळ कार्यालय येथे अनेक मंत्री, नेते, पदाधिकारी आणि कार्यकर्ते यांच्यासोबत रवींद्र चव्हाण अतिशय खेळीमेळीने वागत आहेत. त्यांच्या सोशल मीडिया अकाउंट्सवरही कोणतीही नाराजी दिसून आली नाही. चव्हाणांनीही सोशल मीडियावरील आधीचा बायो बदलून त्याजागी ‘MLA (आमदार), डोंबिवली शहर’ इतकेच लिहिले आहे. त्यामुळेच त्यांची ही शांत, संयत भूमिका चर्चेचा विषय ठरली आहे.

छगन भुजबळ यांनी ‘मी काय तुमच्या हातातले खेळणे आहे का?’ असे म्हणत मनातील खदखद बोलून दाखवली होती. सुधीर मुनगंटीवार ‘मी नाराज नाही’ असे सांगूनही नितीन गडकरी यांच्या भेटीतील चर्चा सांगत नाहीत. डॉ. संजय कुटे सोशल मिडियावर भावनिक पोस्ट टाकत अपमान झाल्याचे म्हणतात. शिवसेनेच्या विजय शिवतारेंनी ‘अडीच वर्षांनी मंत्रीपद दिले, तरी घेणार नाही’ अशी टोकाची भूमिका घेतली. नरेंद्र भोंडेकर यांनी शिवसेनेच्या पदाचा राजीनामा दिला आहे. तानाजी सावंत यांनी आपल्या फेसबुकच्या डीपीमधून धनुष्यबाण चिन्ह काढून टाकले आहे. मात्र, या सगळ्यात रवींद्र चव्हाण समर्थकांनी शांत राहण्याची घेतलेली भूमिका चर्चेचा विषय ठरत आहे. त्यामुळे स्वतःसोबतच समर्थकांची समजूत काढण्यात रविंद्र चव्हाण यशस्वी झाल्याचे दिसते आहे. ‘भाजपा हीच माझी ओळख आहे’ हे चव्हाण यांचे निवडणुकीच्या काळात चर्चेत आलेले विधान आजही ते प्रत्यक्षात आणत असल्याचे दिसत आहे.