राष्ट्रवादी काँग्रेसमध्ये मानसन्मान ठेवला जात नसेल, तर मग तुम्ही भाजपमध्ये प्रवेश करा. तिकडे ओबीसींना न्याय मिळतो. आम्ही तुमच्या सोबत आहोत, अशा प्रकारच्या भावना, भूमिका भुजबळांच्या कार्यकर्त्यांनी आज नाशिकमधील मेळाव्यात मांडल्या. या मेळाव्याला समता परिषदेचे अनेक पदाधिकारी, कार्यकर्ते उपस्थित होते. भुजबळ यांनी सगळ्यांच्या भावना जाणून घेतल्या.
Chhagan Bhujbal: जो न्याय पाटलांना तो मला का नाही? भुजबळांचा रोकडा सवाल; निशाण्यावर अजित पवार, ऑफरचाही समाचार
भुजबळ यांनी आयोजित केलेल्या मेळाव्याला भाजपचेही काही पदाधिकारी उपस्थित होते. भाजप ओबीसी मोर्चाचे महासचिव राजेंद्र महाडोळेंनी मेळाव्यात भाषण केले. त्यावेळी त्यांनी भुजबळांना थेट भाजप प्रवेशाची जाहीर ऑफर दिली. ‘आमच्या ओबीसींच्या जीवाशी जर तुम्ही खेळत असाल, आमच्या आरक्षणाशी, अधिकारांशी तुम्ही खेळत असाल, तर आम्ही तुम्हाला जागा दाखवल्याशिवाय राहणार नाही. साहेबांना माझं आवाहन आहे, ओबीसींचा भाजप ओबीसी मोर्चाचा महासचिव या नात्यानं की साहेबांनी भाजपमध्ये प्रवेश करावा,’ असं आवाहन करत भुजबळांना थेट पक्षप्रवेशाचंच आमंत्रण दिलं.
Chhagan Bhujbal: मंत्रिपद गेलं, पुढे काय? भुजबळांचं ठरलं, नाशकातून मोठी घोषणा; नाराजीमागचा घटनाक्रम सांगितला
कार्यकर्त्यांच्या भावना जाणून घेतल्यानंतर भुजबळ यांनी त्यांना संबोधित केलं. मंत्रिपदं येत जात राहतात. पण ज्या प्रकारची अवहेलना करण्यात आली, ते शल्य मनाला डाचत असल्याची भावना त्यांनी बोलून दाखवली. मंत्रिमंडळात नसलो, तर विधिमंडळात आहे. आमदार म्हणून प्रश्न लावून धरणार. रस्त्यावरची लढाई लढत राहणार, असा निर्धार त्यांनी व्यक्त केला. लवकरच राज्याच्या कानाकोपऱ्यात फिरणार. देशाच्या विविध राज्यांमध्ये जाणार. समता परिषदेच्या माध्यमातून सभा घेणार, अशी घोषणा त्यांनी केली. कार्यकर्त्यांच्या भावना लक्षात घेऊन पुढील निर्णय घेईन. त्यात कोणतीही घाई करणार नाही. पण अखेरच्या श्वासापर्यंत ओबीसींसाठी लढत राहीन, असा शब्द यावेळी त्यांनी दिला.