शिवशाही बस पेट घेतल्याने लाखोंचे नुकसान

सोलापूर आगारातील बस यार्डमध्ये देखभाल दुरुस्ती करून उभ्या करण्यात आलेल्या आरामदायी शिवशाही बसला मध्यरात्री अचानक आग लागली. साडेबारा वाजण्याच्या सुमारास लागलेल्या आगीत बस क्र.एम.एच. ०६. बी. डब्लू. ०५८९ शिवशाही बस जळून खाक झाली. या आगीमध्ये एसटी महामंडळाचे सुमारे १८ लाखांचे नुकसान झाले आहे. शिवशाही बस मधील एअर कंडिशन सिस्टीम तसेच इतर तंत्रज्ञान जळून खाक झाल्याने एसटी महामंडळाला लाखोंचा भूर्दंड सोसावा लागला आहे. तसेच शिवशाहीच्या बाजूला उभी असलेली एम.एच.११ बी.एल. ९०६७ या क्रमांकाच्या सोलापूर – मंगळवेढा या साध्या लालबसला देखील आगीची धग लागली आहे.
संविधानाच्या प्रतीची विटंबना, शेकडोंच्या संख्येने लोक रस्त्यावर, दगडफेक; मुंबईकडे येणारी एक्सप्रेस रोखली

सोमवारी दुपारी आणि सायंकाळी बसच्या काचा फोडल्या

सोलापुरात एकामागे एक दोन घटना घडल्या. मंगळवारी बस जाळलेल्या घटनेआधी दुसरीकडे सोमवारी देखील बसवर दगडफेकीची घटना घडली. दुपारी साडे तीनच्या सुमारास सोलापूर – तुळजापूर रोडवरील डी-मार्टजवळ कारंबा नाका परिसरात तुळजापूर आगाराच्या एका बसगाडीवर (एमएच ११, बीएल ९३६१) दोघांनी दगड मारला. तुळजापूरहून ही धाराशिव विभागाची बस सोलापूरच्या दिशेने येत होती.

चालक दीपक तानाजी जाधव, वाहक संजय किशनराव काटे यांनी या प्रकरणी फौजदार चावडी पोलिसांत फिर्याद दिली आहे. सोलापूर-सातारा बसच्या समोरील काचेवर देखील काहींनी दगड मारुन काच फोडली. या प्रकरणी फौजदार चावडी पोलिसांत गुन्हा दाखल झाला आहे.

एसटी वाहतूक सेवा तात्पुरती बंद

परभणीतील घटनेच्या निषेधार्थ अनेक सामाजिक संघटना आक्रमक झाल्या आहेत. या पार्श्वभूमीवर पोलिसांच्या सूचनांनुसार सोलापूरहून नांदेडला जाणारी बस वाहतूक तात्पुरती थांबवण्यात आली आहे. तर उमरगा (धाराशिव) येथे जाणारी बस वाहतूक देखील बंद ठेवण्यात आली आहे. पोलिसांचे पुढील आदेश येईपर्यंत या मार्गावरील वाहतूक बंद राहील, असे विभाग नियंत्रक अमोल गोंजारी यांनी माध्यमांना माहिती देताना सांगितले.