राष्ट्रवादीकडून एकूण नऊ आमदारांनी घेतली मंत्रिपदाची शपथ

महायुतीच्या मंत्रिमंडळात आज 39 मंत्र्यांनी शपथ घेतली. राष्ट्रवादीकडून एकूण नऊ आमदारांनी मंत्रिपदाची शपथ घेतली. मात्र, यामध्ये छगन भुजबळ यांच्या नावाचा समावेश नव्हता. ओबीसी प्रवर्गातून मराठा समाजाला आरक्षण द्यावे, अशी मागणी ज्यावेळी मनोज जरांगे पाटील यांनी केली. त्यावेळी छगन भुजबळ हे मैदानात उतरले होते. त्यांनी ओबीसी चळवळीचे नेतृत्व केले.
Maharashtra Cabinet Expansion : भाजपकडे १९, तर शिवसेना आणि राष्ट्रवादीचे किती मंत्री? कोणत्या पक्षातून कोणाला संधी; पाहा संपूर्ण यादी
छगन भुजबळ यांना अजित पवारांचा धक्का

राज्यात ओबीसी परिषदा, बैठका झाल्या त्यावेळी छगन भुजबळ उपस्थित असत. विधानसभा निवडणुकीमध्ये छगन भुजबळ विजयी झाले. त्यांचा मंत्रिमंडळात समावेश होईल, अशी चर्चा होती. मात्र, अचानकपणे छगन भुजबळ यांचा पत्ताकट करण्यात आला. अजित पवार भुजबळांवर नाराज असल्याची एक चर्चा आहे. दुसरीकडे देवेंद्र फडणवीस यांचा भुजबळांच्या नावाला विरोध असल्याचेही सांगितले जातंय. छगन भुजबळ यांच्याऐवजी नाशिकमधून मंत्रिमंडळामध्ये नरहरी झिरवळ आणि माणिकराव कोकाटे यांना संधी देण्यात आली.

छगन भुजबळ यांचे समर्थक आणि ओबीसी नेते निराश

1991 मध्ये मंडल कमीशनबाबत देशभरात वातावरण तापले होते. मंडल कमीशनबाबत महाराष्ट्रातही गदारोळ झाला होता. त्यात छगन भुजबळ यांनीही उडी घेतली. शिवसेनेचे आक्रमक नेते म्हणून छगन भुजबळ यांची ओळख होती. 21 डिसेंबर 1991 रोजी छगन भुजबळ तत्कालीन मुख्यमंत्री सुधाकरराव नाईक यांच्या मंत्रिमंडळात सामील झाले. या मंत्रिमंडळाचा विस्तार नागपुरात झाला. मात्र, यावेळी छगन भुजबळ यांना डावलण्यात आल्याने समर्थक नाराज झाले आहेत.