Maharashtra Assembly Winter Session: राज्य विधिमंडळाच्या हिवाळी अधिवेशनाला काही तास शिल्लक असतानाही मंत्रिमंडळ विस्तारातील नावे उघड न झाल्याने तिन्ही पक्षाच्या इच्छुकांची घालमेल चालली आहे.
मुख्यमंत्री देवेंद्र फडणवीस यांच्या नेतृत्वाखाली भाजप, शिवसेना आणि राष्ट्रवादी काँग्रेस महायुतीच्या सत्ता आली. दहा दिवसांपासून मंत्रिमंडळाचा विस्तार लांबलेला आहे. कुणाला संधी मिळते, या उत्सुकतेऐवजी शपथविधी केव्हा व कुठे होतो, याकडे आता राज्याचे लक्ष लागले आहे. उपराजधानीत पहिल्यांदाच नवीन सरकारमधील मंत्र्यांचा शपथविधी होणार आहे. उद्या, रविवारी दुपारी १२ वाजतानंतर सज्ज राहण्याची सूचना स्थानिक प्रशासनाला आली. त्यानुसार ३ वाजता शपथविधी होण्याची दाट शक्यता असल्याने तयारीला वेग आला असून प्रशासनाची तारांबळ उडाली. 
Eknath Shinde: शिंदेंचे ठरले, कॅबिनेटमध्ये कोकणचे तीन चेहरे, नावं ठरली; ठाकरेसेनेचा धुव्वा उडवणाऱ्या संधी
उपराजधानीच्या राजभवन परिसरात भव्य व्यासपीठ व डोमसारखा शामियाना उभारण्याचे काम युद्ध पातळीवर सुरू झाले. या तयारीमुळे प्रशासनावरील ताण अचानक वाढला. बहुतांश संभाव्य मंत्री व सदस्य शनिवारीच येण्याची शक्यता आहे. कुणाला संधी मिळेल हे स्पष्ट झाले नसल्याने सर्वच सदस्य रविवारी सकाळपर्यंत उपराजधानीत पोहोचतील, असा अंदाज आहे. किती मंत्र्यांचा शपथविधी होणार, हे स्पष्ट झालेले नाही.
साधारणत: अधिवेशनानिमित्त अध्यक्ष व सभापती वगळता बहुतांश मंत्री एक दिवस आधी दुपारपर्यंत पोहोचायचे. अन्य मंत्री व सदस्य अधिवेशनाच्या पहिल्या दिवशी सकाळपर्यंत यायचे. त्यामुळे प्रशासनाकडे अंतिम टप्प्यातील तयारीसाठी बराच वाव राहायचा. यावेळी शपथविधी होत असल्याने रविवारी सकाळपर्यंत सर्वांचे आगमन झालेले राहील.
प्रशासनाची तारांबळ
रविवारी दुपारी ३ वाजता मंत्र्याचा शपथविधी झाल्यास त्यानंतर खाते वाटप व ज्येष्ठतेनुसार त्यांची निवास व्यवस्था करावी लागेल. तसेच, मंत्र्यांचे सचिव, विशेष कार्यअधिकारी, स्वीय सहायक अशा सर्व नियुक्त्या राहतील. त्यानुसार वाहन व्यवस्था, नामफलक तयार करण्यासाठी अत्यल्प वेळ मिळणार आहे. त्यामुळे सामान्य प्रशासन, महसूल व सार्वजनिक बांधकाम विभागाचा भार हलका करण्यासाठी सर्व संबंधित विभागप्रमुखांना सज्ज राहण्याची सूचना करण्यात आली असल्याचे समजते.
Cabinet Expansion: १७०० कोटींची कामं, मंत्रिपदाला पक्षातून विरोध होताच महंतांकडून लॉबिंग, सेनेचा ‘तो’ नेता कोण?
दुसऱ्यांदा सोहळा
राज्यात १९९० साली काँग्रेसचे सरकार आल्यानंतर छगन भुजबळ यांच्या नेतृत्वाखाली शिवसेनेत पहिले मोठे बंड झाले. तत्कालीन मुख्यमंत्री सुधाकरराव नाईक यांनी एक वर्षानी मंत्रिमंडळाचा विस्तार केला. भुजबळ व अन्य मंत्र्यांचा २२ डिसेंबर १९९१ रोजी राजभवनात पहिल्यांदा शपथविधी झाला.
तत्कालीन राज्यपाल सी. सुब्रह्मण्यम यांनी मला कॅबिनेट मंत्री व माझ्यासह डॉ. राजेंद्र गोडे, जयदत्त क्षीरसागर, वसुधा देशमुख, श्रीमती बोरसे आणि भरत बाहेकर यांना उपमंत्री म्हणून शपथ दिली, अशी आठवण छगन भुजबळ यांनी सांगितली.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा