अवघ्या ३७७ मतांनी मंदा म्हात्रे यांचा विजय

बेलापूर या मतदारसंघातून महाराष्ट्र नवनिर्माण सेनेकडून नवी मुंबईचे शहराध्यक्ष गजानन काळे यांना उमेदवारी देण्यात आली होती, तर नुकतेच शरद पवार गटात प्रवेश केलेले संदीप नाईक यांचेही आव्हान मंदा म्हात्रे यांच्यासमोर होती. या मतदारसंघामध्ये नाट्यमय घडामोडी पाहायला मिळाल्या. संदीप नाईक यांच्यापेक्षा केवळ ३७७ मताधिक्याने त्यांचा विजय झाला आहे.

या मतदारसंघामध्ये मंदा म्हात्रे यांना ९१ हजार ८५२ मते मिळाली आहेत. तर पराभूत संदीप नाईक यांना ९१ हजार ४७५ मते मिळाली. अवघ्या ३७७ मतांसाठी शरद पवार गटातील नाईकांना पराभव पत्करावा लागला. या मतदारसंघात तिसऱ्या स्थानी असणाऱ्या अपक्ष उमेदवार विजय नहाटा यांना १९,६४६ मते मिळाली. तर मनसेच्या गजानन काळेंना १७ हजार ७०४ मते मिळाली आहेत.

Vidhan Sabha Election Raigad Update: विद्यमान आमदारांनी राखला राय’गड’! शेकापचे उमेदवार हरले प्रतिष्ठेची लढाई, महायुतीचा महाविजय

याआधीही जायंट किलर ठरल्या होत्या मंदा म्हात्रे

२००९ मध्ये पार पडलेल्या विधानसभा निवडणुकीत राष्ट्रवादी काँग्रेसकडून गणेश नाईकांनी भाजपच्या सुरेश हावरे यांचा पराभव केला होता. नाईक यांना ५९ हजार ६८५ मते तर भाजपच्या हावरे यांना ४६ हजार ७१२ मते मिळाली होती. २०१४ च्या निवडणुकीत मात्र बाजी पटलटी आणि भाजपच्या मंदा म्हात्रे यांनी गणेश नाईकांचा म्हणजेच संदीप नाईक यांच्या वडिलांचा पराभव केला. २०१४ मध्ये म्हात्रे यांना ५५ हजार ३१६ तर नाईकांना ५३ हजार ८२५ मते मिळाली. २०१९च्या विधानसभा निवडणुकीआधी गणेश नाईकांनी भाजपमध्ये प्रवेश केला आणि ऐरोली मतदारसंघातून निवडणूक लढवली. त्यामुळे बेलापूरमध्ये मंदा म्हात्रे विरुद्ध राष्ट्रवादीचे अशोक गावडे अशी लढत पाहायला मिळालेली. या लढतीत म्हात्रे यांनी ८७ हजार ८५८ मते मिळवली तर गावडे यांना ४४ हजार २६१ मते मिळाली होती.