Kalyan-Dombivli Voting Percentage: कल्याण-डोंबिवली हद्दीतील चारही मतदारसंघात सकाळ पासूनच मतदारामध्ये उत्साह दिसत होता. मतदान सुरू होण्याआधीच मतदारांनी मतदान केंद्रावर रांगा लावलेल्या दिसल्या.
दुपारच्या उन्हात मतदार मतदान केंद्रावर रांगेत आपला मतदानाचा हक्क बजावण्यासाठी उभे असल्याने मतदानाच्या टक्केवारीने संध्याकाळी ५ वाजता ५० टक्क्यांची सरासरी ओलांडल्याने निवडणूक विभागाने सुटकेचा निश्वास सोडला. सकाळीच मतदान करण्यासाठी ज्येष्ठ नागरिकांसह मतदारांची सुरू असलेली धांदल, लांबच्या केंद्रांवर जाण्यासाठी मतदारांना उपलब्ध करून देण्यात आलेली रिक्षासेवा, मतदान केंद्राबाहेर टेबल लावण्यासाठी कार्यकर्त्यांची धावपळ… यामुळे सकाळपासून शहरात निवडणुकीचा माहोल दिसून आला. मतदान केल्यानंतर शहरातील सर्वच नाश्ता केंद्रांवर मतदारांनी सुट्टीकालीन नाश्ताचा आस्वाद घेतला. अनेक ठिकाणी मतदारांसाठी दुपारच्या जेवणाची सुविधा उपलब्ध होती. यामुळे दुपारच्या सत्रातही मतदारांनी मत देण्यासाठी गर्दी करत, त्यानंतर जेवणाचा आस्वाद घेतला. 
राज्यात मतटक्का वधारला! विधानसभेसाठी सरासरी ६२ टक्के मतदान, दिग्गजांचे भवितव्य मतदानपेटीत बंद
कल्याण-डोंबिवली महापालिकेतील हजारो मतदारांना लोकसभेत मतदानापासून वंचित राहावे लागल्याने विधानसभेत याची पुनरावृत्ती टाळण्याच्या निवडणूक विभागाच्या प्रयत्नांना यश आले आहे. मतदार यादी अद्ययावत करण्याबरोबरच मतदारांना मतदानासाठी सर्व स्तरांतून केलेले आवाहन यशस्वी ठरल्याचे दिसत आहे. डोंबिवली, कल्याण पूर्व, कल्याण ग्रामीण, कल्याण पश्चिम या चारही मतदारसंघात संध्याकाळी ५ वाजेपर्यंत मतदारांचा उत्साह होता. यंदा मात्र दुपारीदेखील मतदारांनी आपला हक्क बजावला. दुपारीही केंद्रावर रांगा होत्या. 
आधी मतदान, मग लग्न! मतदान केल्यानंतरच नवरी चढली बोहल्यावर, नागपूरच्या नेहाचं सर्वत्र कौतुक
संध्याकाळी ५ वाजताच्या आकडेवारीनुसार, डोंबिवलीत ५१.६८ टक्के, कल्याण ग्रामीण भागात ५१.६४ टक्के, कल्याण पूर्वेत ५२.५३ टक्के, तर कल्याण पश्चिममध्ये ४९.७५ टक्के मतदानाची नोंद झाली. निम्म्याहून अधिक मतदारांनी मतदानाचा हक्क बजावल्याने यंदा कमी मतदानाचा शिक्का पुसता आला आहे. पैसेवाटपाचा आरोप कल्याण पूर्व आणि ग्रामीण मतदारसंघात मतदारांना केंद्रांवर पैशाचे वाटप केले जात असल्याचा आरोप केला जात होता. मतदार स्लीपबरोबरच हे वाटप हळूहळू वाढत जात होता. एक हजारांपासून सुरू झालेला हा प्रवास तीन हजारांपर्यंत पोहोचल्याचे बोलले जात होते.
चार-पाच ठिकाणी तांत्रिक बिघाड
कल्याणमधील इंद्रप्रस्थ, महापालिका मतदान केंद्र, महावीर स्कूल, पॅरेडाइज सोसायटी आणि कोपर येथील मतदान यंत्रात तांत्रिक बिघाड झाला होता. मात्र, मशीन विभागाकडून या मशीनमधील बिघाड तत्काळ दुरुस्त करत यंत्रे अद्ययावत करण्यात आली. यामुळे मतदारांना सहज मतदान करणे शक्य झाले.
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस…. आणखी वाचा