सांगली : लोकसभेची सांगलीची जागा काँग्रेसच्या वाट्याला येईल, अशी अपेक्षा ठेवून जागावाटपाकडे डोळे लावून बसलेल्या सांगली जिल्हा काँग्रेसचा मोठा अपेक्षाभंग झाल्याचे चित्र आहे. ही जागा मिळवण्यासाठी मोठा संघर्ष करण्यात पुढाकार घेतलेले आमदार विश्वजित कदम आणि विशाल पाटील हे ‘नॉट रिचेबल’च्या मोडवर गेले. सांगलीची जागा काँग्रेसपासून दुरावल्याचे स्पष्ट होताच मंगळवारी दुपारनंतर कार्यकर्त्यांनी विशाल पाटील यांच्या कार्यालयात गर्दी करायला सुरुवात केली. लोकसभेची जागा काँग्रेसकडून गेल्यानंतर इच्छुक उमेदवार विशाल पाटील यांच्या समर्थकांनी राजीनामे देण्याचा इशारा दिला आहे.
आमदार विक्रम सावंत आणि शहर जिल्हाध्यक्ष पृथ्वीराज पाटील यांनी प्रसारमाध्यमांशी बोलताना बुधवारी दुपारी काँग्रेस पदाधिकाऱ्यांची बैठक बोलावली आहे. त्या बैठकीत सविस्तर चर्चा करून पुढील निर्णय घेऊ, असे सांगितले आहे. युवक काँग्रेसचे जिल्हाध्यक्ष माजी नगरसेवक मनोज सरगर यांच्यासह काही पदाधिऱ्यांनी जागेबाबत झालेल्या निर्णयाचा निषेध करून पक्षपदाचे राजीनामे देण्याचा इशारा दिलेला आहे. समाजमाध्यमांतून ‘आता जनतेच्या कोर्टात जाऊन न्याय मागू या,’ अशा पोस्ट सोशल मीडियावर ‘व्हायरल’ झाल्या आहेत.
‘जत पॅटर्न’ चर्चेत
लोकसभेची सांगलीची जागा न मिळाल्याने नाराज झालेल्यांमधून सन २००९ च्या विधानसभा निवडणुकीत जत विधानसभा निवडणुकीतील झालेल्या ‘काँग्रेस पॅटर्न’ची चर्चा जोर धरू लागली आहे. ‘त्या वाटेने जाऊया,’ असेही काहींचे मत आहे.
महातिढा सुटला, सांगली ठाकरेंना, तर भिवंडी राष्ट्रवादीला, महाविकास आघाडी जागावाटपाचं सूत्र काय?Read Latest Maharashtra News Updates And Marathi News
त्या वेळी काँग्रेस आणि राष्ट्रवादी काँग्रेस आघाडीत जतची जागा राष्ट्रवादीकडे गेल्याने काँग्रेस कमालीची नाराज झाली होती. त्या वेळची काँग्रेसची नाराजी टोकाला गेली होती. संपूर्ण तालुका काँग्रेस बरखास्त करून सर्व जण तत्कालीन भाजपचे उमेद्वार प्रकाश शेंडगे यांच्या पाठीशी उभे ठाकले होते. त्यात शेंडगे यांचा विजयही झाला होता. त्या ‘पॅटर्न’चा अवलंब व्हावा, असे कार्यकर्ते म्हणत आहेत.