नागिंद मोरे, धुळे : शहरातील वैभव अनिल सोनार यांचा अवघा ६ महिन्यांचा मुलगा वेदांश सोनार या चिमुकल्याची चांगली स्मरणशक्ती पाहून त्याला कलाम वर्ल्ड रेकॉर्ड अवार्ड जाहीर करण्यात आला आहे. या कमी वयात त्याच्या बुद्धीचं कौतुक करावं तितकंच कमी आहे. त्याच्या या तेज स्मरणशक्तीचं सर्वच स्तरातून कौतुक केलं जात आहे.

सध्याच्या काळात लहान मुलांना मोबाईलचं व्यसन लागत आहे. पुस्तकी अभ्यासापासून ते दूर होत असून याबाबत अनेक अभ्यासकांकडून चिंता व्यक्त केली जात आहे. अशात धुळे शहरातील सोनार कुटुंबीयांनी आपल्या मुलाची स्मरणशक्ती ओळखत त्याला विविध गोष्टींची चित्र दाखवून ते ओळखायला शिकवलं आणि अवघ्या ६ महिन्यांच्या वेदांश सोनारने या वेगळ्या विक्रमाला गवसणी घातली. त्याला कलाम वर्ल्ड रेकॉर्ड अवॉर्ड मंजूर झाला असून धुळ्यातून सर्वच स्तरातून त्याचं कौतुक केलं जात आहे.
पवारांनी पत्र दाखवलं, दादांनी थेट आव्हान दिलं; धमक्या दिल्या असतील, तर पोलिसांत तक्रार द्या
वेदांशच्या आई-वडिलांच्या लक्षात आलं की, वेदांशला एखादी गोष्ट दाखवली, की ती गोष्ट सहज त्याच्या लक्षात राहते. त्यानंतर त्यांनी त्याला अनेक गोष्टी शिकवण्यास सुरुवात केली आणि विशेष म्हणजे वेदांशने त्या सहजपणे आत्मसात केल्या. वेदांशच्या पालकांनी त्याला एबीसीडी, विविध मुळाक्षरं, १६हून अधिक देशांचे राष्ट्रध्वज, प्राण्यांची नावं, फळं, फुलांची नावं, पक्षी, भाज्या, विविध रंग, १ ते २० पर्यंतचे नंबर, महापुरुषांच्या माहिती हे सर्व त्याला सांगितलं आणि वेदांश हे सर्व काही क्षणातच लक्षात ठेवत होता. त्यामुळे पालकांना त्याचं खूप कुतूहल वाटलं. टीव्ही आणि मोबाईलपासून मुलांना दूर ठेवल्यास त्यांच्या सुप्त गुणांचा माग घेता येईल अशी आशा वेदांशच्या पालकांनी यावेळी व्यक्त केली.
धक्कादायक! तरुणीने सिगारेटचा धूर तोंडावर सोडला, तरुणाने व्हिडिओ बनवला; संतापात दोघींनी मित्राच्या साथीनं युवकाला संपवलं

चांगली स्मरणशक्ती असलेल्या चिमुकल्या मुलांसाठी कलाम वर्ल्ड रेकॉर्ड अवार्ड दिला जातो, अशी माहिती वेदांशच्या पालकांना मिळाली. त्याबाबत त्यांनी माहिती घेऊन ऑनलाइन पद्धतीने त्यासाठी नामांकन भरलं. त्यावेळी त्यांना वेदांशचे व्हिडिओ देण्याबाबत सांगण्यात आलं. त्यांनी वेदांशला महापुरुषांचे फोटो, भाज्यांचे प्रकार, विविध देशांचे झेंडे ओळखतानाचे व्हिडिओ चित्रित करुन पाठवले. वेदांशची तल्लख बुद्धी पाहता, त्याचं नामांकन स्वीकारत अवघ्या ६ महिन्यांच्या असलेल्या वेदांश सोनार या चिमुकल्याची नोंद कलाम वर्ल्ड रेकॉर्डमध्ये करण्यात आली असल्याची माहिती त्याच्या आई-वडिलांनी दिली.