अर्जुन राठोड, नांदेड : जिल्ह्यात मन सुन्न करणारी घटना घडली आहे. पतीच्या अपघाती मृत्यूची बातमी समजताच पत्नीने देखील गळफास घेऊन जीवन संपवले. जिल्ह्यातील नायगाव तालुक्यातील बेंद्री गावात ही घटना घडली आहे. या घटनेनंतर गावात शोककळा पसरली आहे. या घटनेनंतर त्यांची तीन वर्षाची चिमुकली मात्र पोरकी झाली आहे. अरुण बाबुराव बेंद्रीकर (वय ३०) आणि स्नेहल अरुण बेंद्रीकर (वय २७) असं या दांम्पत्याचे नाव आहे.मृत अरुण बेंद्रीकर हे महावितरण विभागात लाईनमेन पदावर होते. विष्णुपुरी येथील महावितरण कार्यालयात ते कार्यरत होते. शनिवारी रात्री अरुण हे दुचाकीने बेंद्री गावातून नांदेड येथे ड्युटीवर जात होते. गावापासून काही अंतरावर असलेल्या मांजरम गावाजवळ येताच अज्ञात वाहनाने त्यांच्या दुचाकीला धडक दिली. या घटनेत अरुण हे गंभीररित्या जखमी झाले होते. त्यांच्या डोक्याला मार लागला होता. रक्तबंबाळ झालेल्या जखमी अवस्थेत त्यांना नांदेडच्या विष्णुपुरी येथील रुग्णालयात दाखल करण्यात आले.
शिवशाही बस आणि रिक्षाचा भीषण अपघात, दुर्घटनेत तिघांचा मृत्यू; रिक्षाचा चक्काचूर
अरुण यांची पत्नी स्नेहल देखील आपल्या पतीला पाहण्यासाठी नातेवाईकांसोबत रुग्णालयात आल्या होती. मात्र समजूत काढून तिला घरी पाठवण्यात आले. दरम्यान उपचार सुरू असताना अरुण यांचा मृत्यू झाला. पतीच्या मृत्यूची बातमी समजताच पत्नीला देखील मोठा धक्का बसला. काही वेळातच स्नेहल यांनीही आपल्या राहत्या घरी गळफास घेऊन जीवन संपवले.
खासगी बसचा भीषण अपघात, दीड महिन्याच्या बाळासह तिघांचा दुर्दैवी अंत

या घटनेने बेंद्रीकर कुटुंबियांवर दुःखाचा डोंगर कोसळला आहे. पती-पत्नीच्या अशा अचानक निधनाने बेंद्री गावात शोककळा पसरली आहे. अरुण बेंद्रीकर आणि स्नेहल बेंद्रीकर यांना तीन वर्षाची मुलगी असल्याची माहिती आहे. आता आई-वडिलांविना चिमुकली पोरकी झाली आहे. रविवारी सकाळी पती-पत्नी दोघांवर अंत्यसंस्कार करण्यात आले. अंत्यविधीसाठी आलेल्या नागरिकांना अश्रू अनावर झाले होते.