निलेश पाटील, जळगाव : जळगाव शहरात धक्कादायक घटना समोर आली आहे. एका २२ वर्षीय तरुणीने ती राहत असलेल्या भाड्याच्या खोलीत गळफास घेत आयुष्य संपवलं आहे. सायंकाळी ५ वाजता तरुणीची मैत्रीण खोलीवर आली असता, खोलीचं दार आतून बंद होतं. बराच वेळ तिने दरवाजा ठोठावला परंतु आतून कोणताही प्रतिसाद मिळाला नाही. त्यानंतर तिने खोलीच्या मागच्या दरवाजातून डोकावून पाहिलं असता तरुणी तिला गळफास घेतलेल्या अवस्थेत दिसली. रविवारी संध्याकाळी ही घटना घडली.जळगाव शहरातील शासकीय वैद्यकीय महाविद्यालयातील नर्सिंग महाविद्यालयात पहिल्या वर्षात शिकत असलेल्या विद्यार्थींनीने टोकाचं पाऊल उचललं. दिक्षितवाडी येथे राहत असलेल्या खोलीत तिने आत्महत्या केल्याची घटना रविवारी ७ एप्रिल रोजी सायंकाळी पाच वाजेच्या सुमारास घडली. तिच्या आत्महत्येचे कारण अद्याप समोर आलेलं नाही. करुणा संतोष बोदडे वय २२ रा. वाडोदा ता. यावल ह.मु. दिक्षीतवाडी जळगाव असं मृत्यू झालेल्या विद्यार्थींनीचे नाव आहे.
पतीचा अपघातात मृत्यू, पत्नीने परिस्थितीसमोर हात टेकले, आयुष्याचा दोर कापण्याचा कटू निर्णय, चिमुकली पोरकी
मिळालेल्या माहितीनुसार, जळगाव शहरातील शासकीय वैद्यकीय महाविद्यालयातील नर्सिंग महाविद्यालयात पहिल्या वर्षात करुणा बोदडे ही तरुणी शिकत होती. करुणा बोदडे दिक्षीतवाडी परिसरात भाड्याच्या खोलीत मैत्रीणींसोबत राहत होती.
शिवशाही बस आणि रिक्षाचा भीषण अपघात, दुर्घटनेत तिघांचा मृत्यू; रिक्षाचा चक्काचूर
दरम्यान, तिच्या सोबतच्या सर्व मैत्रिणी या गावाला गेल्या होत्या. त्यामुळे रविवारी ७ एप्रिल रोजी करुणा खोलीत एकटीच होती. तिने राहत्या घरात छताला ओढणीने गळफास घेऊन आत्महत्या केली. तिची एक मैत्रिण सायंकाळी ५ वाजता खोलीवर आली असता खोलीचं दार आतून बंद होतं. बराच वेळ तिने दरवाजा ठोठावला पण आतून प्रतिसाद मिळाला नाही. त्यानंतर खोलीच्या मागच्या दरवाजातून तिने पाहिलं असता करुणाने गळफास घेतल्याचं समोर आलं. या घटनेची माहिती जिल्हापेठ पोलीसांना देण्यात आली.

पोलीस कर्मचारी यांनी घटनास्थळी धाव घेत पंचनामा केला आणि मृतदेह शासकीय वैद्यकीय महाविद्यालयात नेण्यात आला. यावेळी वैद्यकीय अधिकारी डॉ निखिल तायडे यांनी तपास करुन तरुणीला मृत घोषित केलं. आत्महत्या करण्याचं कारण अद्याप समोर आलेले नाही. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे.