प्रवीण चौधरी, जळगाव : लोकसभा निवडणुकीच्या पार्श्वभूमीवर महाराष्ट्रात फारशी चांगली स्थिती नसल्याने तसेच आरक्षणाच्या मुद्द्यामुळे मराठा मते दूर जाण्याची भीती भाजपाच्या दिल्लीतील नेतृत्वाला सतावत आहे. त्यामुळेच आमदार एकनाथ खडसे यांच्यासारखा ओबीसी समाजातील ‘मास लिडर’ पुन्हा पक्षात आणून भाजपाने ‘ओबीसी कार्ड’ खेळले आहे. खडसे कुठलीही निवडणूक लढविणार नसले तरी लोकसभा व आगामी विधानसभा निवडणुकीत महाराष्ट्रासह उत्तर महाराष्ट्रात त्यांचा ओबीसी समाजातील ‘मास लिडर’ म्हणून वापर करुन विजयाचे गणित मांडण्याचा प्रयत्न भाजप नेतृत्वाकडून करण्यात आला आहे.सुरुवातीच्या शेटजी व भटजी यांचा पक्ष म्हणून ओळखल्या जाणाऱ्या भाजपाला दिवंगत नेते गोपीनाथ मुंडे व त्यांच्यानंतर एकनाथ खडसे यांनी तळगाळात रुजविण्याचे काम केले. हे दोन्ही नेते भाजपातील ओबीसी समाजाचा चेहरा तसेच ‘मास लिडर’ म्हणून त्या काळात भाजपाचे नेतृत्व देखील करीत होते. राष्ट्रीय राजकारणात गेल्यानंतर गोपीनाथ मुंडे यांचे निधन झाले. तर राज्यात सत्तेत असतांनाच मुख्यमंत्रिपदासाठी दावेदारी ठोकल्याने आमदार एकनाथ खडसे देखील पक्षांतर्गत राजकारणात भरडले गेले. भोसरी जमीन खरेदी प्रकरणात खडसेंना मंत्रीपदाचा राजीनामा द्यावा लागला. खडसेंचे आमदारकीचे तिकीट कापून त्याऐवजी त्यांच्या कन्या अॅड. रोहिणी खडसे यांना दिले. त्यांचा पराभव झाला. यामुळे बिथरलेल्या खडसेंनी फडणवीस व जिल्ह्यातील नेते गिरीश महाजन यांच्यावर आरोप करीत भाजपाला सोडचिठ्ठी देत राष्ट्रवादीची वाट धरली. आता पुन्हा खडसे स्वगृही भाजपात परतत आहेत.
एकनाथ खडसेंची होणार घरवापसी, भाजपमध्ये परतण्याबाबत शिक्कामोर्तब

अंतर्गत राजकारणापेक्षा निवडणूक महत्वाची

राज्याचे नेते फडणवीस व त्यांचे खंदे समर्थक गिरीश महाजन यांचा विरोध डावलून भाजपाच्या केंद्रीय नेतृत्वाने खडसेंच्या प्रवेशाल हिरवा कंदील दाखविला हे विशेष! भाजपाने लोकसभेसाठी ‘चारसौ पार’ चा नारा दिला आहे. त्यामुळे एक एक जागा महत्वाची आहे. त्यामुळे अंतर्गत राजकारणापेक्षा आज निवडणुकीतील विजय भाजपासाठी महत्वाचा असल्याने खडसेंचे केंद्रीय नेतृत्वाने स्वागत केले.
भाजप प्रवेशावर एकनाथ खडसेंची पहिली प्रतिक्रिया, सर्व चर्चांना पुर्णविराम देत म्हणाले- लवकरच…

‘मराठा’ मतांचे नुकसान ‘ओबीसी’तून भरणार

महाराष्ट्रात भाजपाला फारसे अनुकल वातावरण नसल्याची भीती व्यक्त होत आहे. तसेच आरक्षणाच्या मुद्द्यावरुन मराठा समाजातील मते दूर जाण्याची भीती आहे. हे नुकसान भरुन काढण्यासाठी आता भाजपाकडून ‘ओबीसी कार्ड’ खेळले जात आहे. पंकजा मुंडे यांना उमेदवारी, नाशकातून छगन भुजबळांना उमेदवारी देण्यासाठीचा आटापिटा तसेच मागील काही दिवसांत भाजपामधील चंद्रशेखर बावनकुळे यांचे वाढलेले महत्व पाठोपाठ भाजप नेत्यांवर टोकाची टीका करणाऱ्या एकनाथ खडसेंसांठी घातलेल्या पायघड्या यावरुन भाजपाकडून ओबीसी नेत्यांना गोंजारण्याचा प्रयत्न होत असल्याचे स्पष्ट दिसत आहे.
जळगावात भाजपला मोठा धक्का, खासदार उन्मेष पाटील ठाकरे गटात प्रवेश करणार, मुहूर्त ठरला!

लोकसभेसह विधानसभेसाठीही खडसेंचा फायदा

जळगाव जिल्ह्यातील रावेर मतदारसंघात खडसेंच्याच स्नुषा यांना उमेदवारी दिल्याने खडसे तेथे ताकद लावतीलच. मात्र, जळगाव मतदारसंघात भाजपाचे माजी खासदार उन्मेश पाटील ठाकरे गटात गेल्याने झालेले नुकसान भरण्यासाठी देखील खडसेंची मदत होईल. तेथील लेवा समाजावर असलेला खडसेंचा प्रभाव त्यासाठी कामात येईल. तसेच खडसेंना सोबत घेतल्याने महाराष्ट्रातील ओबीसी समाजात देखील सकारात्मक संदेश गेल्याने विधानसभा निवडणुकीत देखील ओबीसी प्रभाव असलेल्या मतदारसंघात फायद्याचे गणित भाजपाकडून या निमित्ताने मांडले गेले आहे. जळगाव जिल्ह्याचा विचार केल्यास विधानसभा निवडणुकीतही खडसेंच्या प्रवेशामुळे मुक्ताईनगर, भुसावळ, जळगाव, रावेर या चार मतदारसंघातही पक्षाला बळ मिळेल.

स्थानिक पातळीवर गिरीश महाजनांना वेसण

एकनाथ खडसे भाजपाचे जिल्ह्यातील नेते गिरीश महाजन यांचे कट्टर विरोधक मानले जातात. त्यांच्या विरोधानंतर देखील खडसेंचा भाजपात होत असलेला प्रवेश म्हणजे म्हणजे गिरीश महाजन यांनाही केंद्रीय नेतृत्वाकडून वेसण घालण्याचा प्रयत्न मानला जात आहे. अंतर्गत राजकारणामुळे पक्षाचे नुकसान सहन केले जाणार नाही, असा संदेशच महाजन यांना देण्यात आला आहे.