पुणे: ११ एप्रिल रोजी सासवडच्या पालखीतळावर महायुतीच्या शेतकरी जनसंवाद सभेचे आयोजन करण्यात आले आहे. माजी राज्यमंत्री विजय शिवतारे यांनी बारामती लोकसभा मतदारसंघात दंड थोपटल्यानंतर शिवतारे यांचे बंड रोखण्याचे प्रचंड प्रयत्न झाले होते. पुरंदर, हवेली, भोर, वेल्हा, खडकवासला, बारामती आणि इंदापूर येथील महत्त्वपूर्ण प्रश्न सोडविण्याच्या अटीवर शिवतारे यांनी आपले बंड माघारी घेतले.
जेलमध्ये जाणे त्यांच्या तब्येतीला परवडणारे नव्हते, खडसेंचा पक्षप्रवेशावरून रोहित पवारांचे भाजपवर गंभीर आरोपमात्र याबाबतचे सुतोवाच तिघांनीही जनतेसमोर जाहीर सभेत करावे, अशी मागणी शिवतारे यांनी केली होती. त्यानुसार या सभेला मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार हे तिघेही उपस्थित राहणार असल्याची माहिती शिवतारे यांनी दिली. सासवड येथे आयोजित पत्रकार परिषदेत ते बोलत होते.यावेळी शिवतारे म्हणाले, उपमुख्यमंत्री अजित पवार यांच्याबाबत माझी भूमिका स्पष्ट होती. मात्र महायुतीच्या शीर्षस्थ नेत्यांकडून बंड न करण्याबाबत मला वारंवार आग्रह केला गेला. खासदार झालो असतो तरी गुंजवणी, विमानतळ, उत्रोली एमआयडीसी, आयटी पार्क, फुरसुंगी उरुळी देवाची नगरपरिषद आणि अन्य प्रश्नांसाठी मला राज्यातील नेत्यांसोबतच काम करावे लागले असते. त्यामुळे ज्या प्रश्नांसाठी जीवाचे रान केले ते या तिघांच्या समन्वयातून मार्गी लावून घेण्याला मी प्राधान्य देण्याचा निर्णय घेतला आहे.

जिल्हा बँकेचे चेअरमन दिगंबर दुर्गाडे म्हणाले, माजी मंत्री विजय शिवतारे यांनी स्थानिक प्रश्नांच्या अनुषंगाने घेतलेली भूमिका स्वागतार्ह आहे. गुंजवणी, विमानतळ सारख्या महत्वाच्या प्रश्नांना हात घालून त्यांनी मतदारसंघाच्या विकासाला चालना देण्यासाठी या सभेचे आयोजन केलेले आहे. महायुतीच्या मेळाव्यातून या प्रश्नांच्या सोडवणुकीसह सुनेत्रा पवार यांच्या विजयाची पायाभरणी होईल, असा विश्वासही त्यांनी व्यक्त केला.