डोंबिवली : ठाणे आणि कल्याण डोंबिवली या लोकसभेच्या दोन्ही जागांवरुन शिवसेना-भाजपमध्ये धुसफूस सुरु आहे. भाजपचे कल्याण पूर्वेतील पदाधिकारी, कार्यकर्ते आणि आमदार गणपत गायकवाड यांचे समर्थक कल्याण लोकसभा मतदारसंघावरुन आक्रमक झाले आहेत. कल्याण डोंबिवलीची जागा शिवसेनेच्या श्रीकांत शिंदे यांना मिळाली तर भाजपचा एकही कार्यकर्ता काम करणार नाही, असा इशारा भाजप कार्यकर्त्यांनी दिला होता. यासंबंधी एक बैठक देखील कल्याण पूर्वेत पार पडली. याला २४ तासही होत नाहीत, तोच उपमुख्यमंत्री देवेंद्र फडणवीस यांनी श्रीकांत शिंदेंना उमेदवारी घोषित केली. त्यामुळे महायुतील हा वाद शमणार की वाढणार, भाजप कार्यकर्ते अधिकृत घोषणेनंतर काय भूमिका घेणार, याकडे सर्वांचे लक्ष लागून राहिले आहे.

कल्याण लोकसभेची जागा भाजपाला मिळाले पाहिजे, अशी आग्रही मागणी स्थानिक भाजप नेते व पदाधिकारी वरिष्ठांकडे करणार होते. जर ही जागा भाजपला मिळाली नाही तर महायुतीचे काम करणार नाही, असेही वरिष्ठांना कळवण्यात येणार होते. अशा मागण्यांचं सह्या केलेले एक निवेदनही भाजपचे प्रदेशाध्यक्ष चंद्रशेखर बावनुळे यांना सादर करण्यात येणार असल्याची चर्चा रंगली होती.

भाजपचे आमदार गणपत गायकवाड यांच्या कार्यालयात भाजपचे स्थानिक नेते, पदाधिकारी आणि कार्यकर्ते, तसेच आमदार गायकवाड यांच्या समर्थकांची एक बैठक पार पडली. जर कल्याणमधून मुख्यमंत्री एकनाथ शिंदे यांचे पुत्र श्रीकांत शिंदेंना उमेदवारी दिली गेली तर भाजपचा एकही कार्यकर्ता त्यांच्यासाठी काम करणार नसल्याची आक्रमक भूमिका यावेळी घेण्यात आली. शिंदे उमेदवार असल्यास काम करणार नसल्याचा ठराव देखील भाजच्या कार्यकर्त्यांनी संमत केल्याची सूत्रांची माहिती आहे.

देवेंद्र फडणवीस नेमकं काय म्हणाले?

भारतीय जनता पक्षाकडून विरोध नाही. श्रीकांत शिंदे हे कल्याणमधले शिवसेनेचे उमेदवार असणार आहेत. ते महायुतीचे उमेदवार असतील. भारतीय जनता पक्ष त्यांच्या पाठीशी खंबरीपणे उभा राहणार आहे. पूर्ण ताकदीने आणि मागच्या वेळीपेक्षा जास्त मतांनी डॉ. श्रीकांत शिंदे यांना कल्याणमधून आम्ही सगळे- भारतीय जनता पार्टी, शिवसेना, राष्ट्रवादी, रिपाइं, रासप- आमची जी बृहद युती आहे, त्यांना निवडून आणेल, असं देवेंद्र फडणवीस म्हणाले.
पृथ्वीराज चव्हाण ‘तुतारी’वर लढण्यास तयार असते, तर साताऱ्यातून उमेदवारी, शरद पवारांची अट?

फोटो-बॅनर न लावण्याचा निर्णय

कल्याण लोकसभेची जागा भाजपला मिळावी यासाठी कल्याण पूर्वेत ही भाजप कार्यकर्त्यांची बैठक पार पडली. लोकसभेची जागा भाजपलाच मिळावी यासाठी पदाधिकाऱ्यांची निर्णय आणि चर्चा झाल्याची जोरदार चर्चा आहे. याआधी शिंदेंच्या शिवसेनेच्या नेत्यांचे फोटो बॅनर न लावण्याचा निर्णय कल्याण पूर्वेतील भाजप पदाधिकारी यांनी घेतला होता. पुन्हा एकदा हा वाद उफाळून आला आहे.
हातची गेली सांगली, काँग्रेस कावली चांगली, ठाकरेंनी उमेदवार दिलेल्या मतदारसंघावर आता डोळा

शिवसेना जिल्हाप्रमुख गोपाळ लांडगे यांचे उत्तर

भाजप कार्यकर्ते यांच्या या बैठकीनंतर आता शिवसेना आक्रमक झाली असून ज्या आमदाराने गोळीबार केला त्या आमदारांच्या समर्थकांनी भाजप कार्यकर्ता असल्याचे भासवण्याच्या कितीही प्रयत्न केला तरी ते भाजपचे नाहीत, भाजपा शिवसेना राष्ट्रवादी आरपीआय यांना एकत्र घेऊन श्रीकांत शिंदे काम करतात. त्यामुळे ते मोठ्या मताधिक्याने निवडून येतील. आमदार गणपत गायकवाड यांनी जे कृत्य केले ते निश्चितच चुकीचं आहे आणि जर त्यांचे समर्थक असा काही कांगावा करत असतील आणि युतीमध्ये घोळ घालण्याचा प्रयत्न करत असतील तर त्यामुळे गणपत गायकवाड यांना जामीन होईल असं अशा भ्रमात त्यांनी राहू नये, श्रीकांत शिंदे यांच्या बाबतीत अपप्रचार करू नये त्यामुळे युतीचं वातावरण बिघडू शकतं, युतीचे वातावरण बिघडू नये यासाठी बीजेपीच्या वरिष्ठ पदाधिकाऱ्याने निश्चितपणे लक्ष घालावं आणि त्या दृष्टीने असे जे काही गुंड प्रवृत्तीचे लोक युतीचं वातावरण बिघडवण्याचा प्रयत्न करतात त्यांचा बंदोबस्त करावा अशी मागणी शिवसेना शिंदे गटाचे जिल्हाप्रमुख गोपाळ लांडगे यांनी केली आहे.
Read Latest Maharashtra News Updates And Marathi News

कल्याण पूर्वचे भाजप आमदार गणपत गायकवाड यांच्या कार्यालयात भाजप कार्यकर्त्यांचे बैठक झाली या बैठकीत भाजप कार्यकर्त्यांनी कल्याण लोकसभा मतदारसंघ भाजपला मिळावा अन्यथा काम करणार नाही असा इशारा दिला होता या बैठकीतला शिवसेना शिंदे गटाने प्रतिउत्तर दिलंय .