पुणे : लोकसभा निवडणुकीच्या पार्श्वभूमीवर राष्ट्रीय समाज पक्षाचे अध्यक्ष आणि महायुतीचे परभणीतील उमेदवार महादेव जानकर यांना मात देण्यासाठी शरद पवार आपला तगडा शिलेदार प्रचारासाठी मैदानात उतरवण्याच्या तयारीत आहेत. भूषणसिंह होळकर यांच्यासोबत काही दिवसांपासून पवारांच्या भेटीगाठी आणि जवळीक वाढत चालली आहे. येत्या शनिवारी होळकरांनी आयोजित केलेल्या कार्यक्रमाला शरद पवार यांचं नाव प्रमुख उपस्थितांमध्ये आहे. त्यामुळे भूषणसिंह होळकर शरद पवारांच्या वतीने महाविकास आघाडीसाठी प्रचार करणार का? अशी चर्चा राजकीय वर्तुळात केली जात आहे. परभणीतून विद्यमान खासदार संजय जाधव पुन्हा रिंगणात उतरले आहेत.
भूषणसिंह होळकर यांनी काही दिवसांपूर्वी शरद पवार यांची भेट घेतली होती. किल्ला विकासा संबंधित ही भेट असल्याचं त्यांनी सांगितलं होतं. पण त्यानंतर पवार आणि भूषणसिंह होळकर यांचा संपर्क वाढला. महादेव जानकर यांनी महाविकास आघाडीला खो देऊन महायुतीमधून परभणीची उमेदवारी मिळवली. जानकरांना महायुतीमधून उमेदवारी मिळाल्यानंतर धनगर मतांचे विभाजन होऊ शकते. म्हणून बारामती आणि माढ्याचा विचार करता भूषणसिंह होळकर यांचा शरद पवार आपल्या पक्षात प्रवेश करून घेतील, अशी शक्यता वर्तवली जात आहे.
सूत्रांकडून मिळालेल्या माहितीनुसार भूषणसिंह होळकर हे काही दिवसात पक्षात प्रवेश करतील अशी माहिती मिळाली आहे. शाहू, फुले, आंबेडकर यांचा विचार आणि बहुजन एकता ठेवण्यासाठी भूषणसिंह होळकर हे भाजपच्या विरोधात प्रचार करणार, असे स्वतः भूषणसिंह होळकर म्हणाले आहेत.
काँग्रेसमधून मुक्ती मिळाल्याने हलकं वाटतंय, छातीवरचं ओझं उतरलं, संजय निरुपम यांची ‘मन की बात’
Read Latest Maharashtra News Updates And Marathi News
परभणीतून महाविकास आघाडीतर्फे शिवसेना (उद्धव बाळासाहेब ठाकरे) पक्षाचे विद्यमान खासदार संजय जाधव यांना पुन्हा उमेदवारी देण्यात आली आहे. शिवसेनेच्या तिकिटावर दोन वेळा खासदार राहिलेल्या जाधवांना यंदाच्या लोकसभेला विजयाची हॅटट्रिक करण्याची संधी आहे. मात्र महायुतीने परभणीत जानकरांच्या रुपाने मोठं आव्हान उभं केलं आहे. परभणी लोकसभा मतदारसंघात धनगर समाजाचं प्राबल्य असल्यामुळे ती मतंही निर्णायक ठरणार आहेत.