मुंबई : शिवसेना (उद्धव बाळासाहेब ठाकरे) पक्षाची बहुप्रतीक्षित दुसरी लोकसभा उमेदवार यादी जाहीर झाली आहे. भाजप खासदार उन्मेष पाटील यांनी ठाकरे गटात प्रवेश केला. त्यानंतर पत्रकार परिषदेत ठाकरेंनी थेट चार उमेदवारांची घोषणा केली. एकनाथ शिंदे यांचे सुपुत्र श्रीकांत शिंदे यांच्या कल्याण डोंबिवली लोकसभा मतदारसंघातून ठाकरेंनी वैशाली दरेकर राणे यांना तिकीट दिलं आहे. धक्कातंत्राचा वापर करत ठाकरेंनी कल्याणमधून सर्वसामान्य शिवसैनिकाला तिकीट दिलं आहे.
कल्याण डोंबिवली लोकसभा मतदारसंघातून अद्याप महायुतीतर्फे उमेदवाराची घोषणा झालेली नाही. एकनाथ शिंदे यांचे सुपुत्र आणि विद्यमान खासदार श्रीकांत शिंदे यांना पुन्हा तिकीट मिळणं निश्चित मानलं जात असलं, तरी त्यांचा मतदारसंघ बदलण्याची चर्चा आहे. मात्र उद्धव ठाकरेंनी उमेदवाराच्या घोषणेत आघाडी घेत कल्याणमधून वैशाली दरेकर राणे यांना तिकीट जाहीर केलं. एका सर्वसामान्य कुटुंबातील महिलेला तिकीट देत असल्याचं ठाकरेंनी जाहीर केलं. दरेकर या ठाकरे गटाच्या उपशाखा संघटक पदावर कार्यरत आहेत.
कोण आहेत वैशाली दरेकर?
वैशाली दरेकर या शिवसेनेच्या नगरसेविका राहिल्या आहेत. मध्यंतरी त्यांनी महाराष्ट्र नवनिर्माण सेनेत प्रवेश केला होता. मनसेतर्फे त्या नगरसेविका राहिल्या होत्या, त्यांनी विरोधीपक्ष नेते पद भूषवलं आहे. २००९ मध्ये त्यांनी मनसेमधून कल्याण लोकसभेची निवडणूक लढवली होती. तेव्हा त्यांना एक लाख ९ हजार मतं पडली होती. २०१६ साली त्यांनी परत शिवसेनेत पक्ष प्रवेश केला.
कल्याण डोंबिवलीतून आनंद दिघे यांचे पुतणे केदार दिघे यांच्यापासून अगदी आदित्य ठाकरे, सुषमा अंधारे यासारख्या नावांचीही चर्चा झाली होती. परंतु माहिती नसलेला चेहरा देत ठाकरेंनी धक्कातंत्र अवलंबल्याची चर्चा आहे.
वापरा अन् फेका ही भाजपची वृत्ती, तुम्ही माझीच व्यथा मांडलीत, ठाकरेंच्या हस्ते उन्मेष पाटलांना शिवबंधन
याशिवाय, हातकणंगले येथून राजू शेट्टी यांच्याविरोधात ठाकरेंनी उमेदवार दिला आहे. माजी आमदार सत्यजीत आबा पाटील यांना तिकीट देण्यात आलं आहे. भाजप खासदार उन्मेष पाटील यांना तिकीट मिळण्याची चर्चा असतानाच जळगावातून करण पवार यांना तिकीट देण्यात आलं आहे. तर पालघरमधून भारती कामडी यांना उमेदवारी मिळाली आहे.
Read Latest Maharashtra News Updates And Marathi News
ठाकरे गटाची दुसरी लोकसभा उमेदवार यादी
कल्याण डोंबिवली – वैशाली दरेकर राणे
हातकणंगले – सत्यजीत पाटील
पालघर – भारती कामडी
जळगाव – करण पवार