शुभम बोडके, नाशिक : नाशिक लोकसभेच्या जागेवरून भाजप आणि शिवसेनेच्या शिंदे गटात रस्सीखेच सुरू असताना राष्ट्रवादीचे ज्येष्ठ नेते छगन भुजबळ यांची एन्ट्री झाली झाल्याने शिवसेना शिंदे गटाचे विद्यमान खासदार हेमंत गोडसेंची चांगलीच धाकधूक वाढली आहे. भुजबळांच्या नावावर दिल्लीतून शिक्कामोर्तब झाल्याचे वृत्त आल्याने विद्यमान खासदार हेमंत गोडसे यांचं टेन्शन मात्र वाढलं आहे.
नाशिक लोकसभेची जागा सध्या शिवसेनेच्या शिंदे गटाकडे असून तेथे विद्यमान खासदार हेमंत गोडसे हे तिसऱ्यांदा निवडणूक लढविण्याची तयारी केली असून हॅट्रिक करण्यास ते इच्छुक आहेत. मात्र त्यांची हॅट्रिक वाटते तेवढी सोपी नाही. त्याचं कारण म्हणजे शिवसेनेचे विद्यमान खासदार असलेल्या या जागेवर भाजपनेही दाव ठोकला असून आता राष्ट्रवादीचे हेवीवेट नेते छगन भुजबळ यांचे नाव सध्या जोर धरत आहे. काही दिवसांपूर्वी नाशिक लोकसभेच्या जागेवरून शिंदे गट आणि भाजपमध्ये रस्सीखेच सुरू होती. आता मात्र राष्ट्रवादीच्या अजित पवार गटाने दावा ठोकला असून नाशिक लोकसभेचा पेच आणखी वाढला आहे. त्यामुळे नाशिक लोकसभेचा जागा वाटपाचा तिढा सोडवण्याचे मोठे आव्हान महायुतीच्या नेत्यांपुढे उभे ठाकले आहे.
विद्यमान खासदार हेमंत गोडसे सलग दोन वेळा लोकसभेवर निवडून गेले आहेत. तिसऱ्यांदा ते निवडणुकीसाठी इच्छुक आहेत तर दुसरीकडे भाजपने नाशिक जिल्ह्यात आमची ताकद शिंदे गटापेक्षा जास्त असून शहरात तीन आमदार असताना नाशिक लोकसभेची जागा आम्हाला म्हणजेच भाजपला द्यावी अशी मागणी वरिष्ठ नेत्यांकडे केली आहे. मात्र मागील काही दिवसांत राष्ट्रवादी काँग्रेसचे हेवीवेट नेते छगन भुजबळ यांचे नाव सध्या नाशिक लोकसभेसाठी विशेष चर्चेत आहे. भुजबळांनी दिल्लीत फील्डिंग लावली असून दिल्लीतूनच त्यांच्या नावावर शिक्कामोर्तब देखील झाल्याचे सूत्रांचे म्हणणे आहे.
उमेदवारीआधीच भुजबळ रिजेक्ट, नाशिकच्या ‘या’ गावाच्या वेशीवर लागले गावबंदीचे बॅनर
विद्यमान खासदार हेमंत गोडसे यांच्या अडचणी वाढल्या आहेत. हेमंत गोडसे हे २०१४ साली छगन भुजबळांचाच पराभव करून विजयी झाले होते. दुसरीकडे छगन भुजबळांना उमेदवारी मिळण्याआधीच नाशिक जिल्ह्यातील मराठा समाजाकडून त्यांना मोठ्या प्रमाणात विरोध होताना दिसत आहे. गावोगावी भुजबळांच्या विरोधात मराठा समाज आक्रमक झाला असून त्यांना काही ठिकाणी गावबंदीही करण्यात आली आहे. तशा स्वरुपाचे पोस्टरही लावण्यात आले आहेत. छगन भुजबळ यांनी मराठा समाजाच्या आरक्षणास विरोध केल्याचा राग अजूनही मराठा समाजात असून त्याचे परिणाम दिसून येत आहे.हेमंत गोडसेंच्या उमेदवारीला विरोध, नाशिक लोकसभेसाठी कोणाची लॉटरी लागणार? महायुतीत रस्सीखेच
दुसरीकडे हेमंत गोडसे यांची कामगिरी समाधानकारक नसून त्यांना उमेदवारी देऊ नये अशा मागणी भाजपकडून करण्यात येत आहे. मात्र तरीही छगन भुजबळ यांना उमेदवारी मिळाली तर हेमंत गोडसे हे अपक्ष लढणार का? किंवा गोडसेंना राज्यसभेवर संधी दिली जाऊ शकते? यासारख्या अनेक प्रश्नांची उत्तरे गुलदस्त्यात आहेत.
हेमंत गोडसे यांचा ग्रामीण भागातील जनसंपर्क दांडगा असून त्यांच्या साध्या व सरळ स्वभावामुळे ते जनतेत लोकप्रिय आहेत. दुसरीकडे छगन भुजबळ यांनी नाशिक जिल्ह्याचा केलेला कायापालट, विकास कामांमुळे त्यांनाही उमेदवारीसाठी पसंती असल्याची दिल्ली दरबारी चर्चा आहे.