रायगड : कोकणातील रायगड मधील विद्यमान खासदार सुनील तटकरे यांची उमेदवारी राष्ट्रवादीची अजितदादांकडून जाहीर झाली आहे. ते पुन्हा एकदा यावेळी लोकसभेच्या रिंगणात असणार आहेत मागील वेळी शिवसेनेचे अनंत गीते यांच्यावरती दणदणीत विजय मिळवलेल्या सुनील तटकरे यांचा २०१४ साली निसटता पराभव झाला होता. त्यावेळेलाही तटकरे यांना शेकापची साथ नव्हती. २०१४ साली झालेल्या निवडणुकीत सुनील तटकरे यांच्याच नावाचा डमी उमेदवार उभा करण्यात आला होता आणि येथेच विद्यमान खासदार सुनील तटकरे यांचा घात झाला.
रायगड जिल्ह्यात प्रस्थापित उमेदवाराला शह देण्यासाठी त्याच नावाने डमी उमेदवार उभा करण्याची पद्धत तत्कालीन काँग्रेसचे नेते, माजी मंत्री दत्ताजी खानविलकर यांनी सुरू केली. १९९१ साली शेकापचे दत्ता पाटील यांना शह देण्यासाठी दत्ता पाटील याच नावाचा उमेदवार त्यांनी उभा केला होता, त्याने १५ हजार मते घेतली आणि त्यावेळी शेकापच्या दत्ता पाटील यांचा पराभव झाला होता. तेव्हापासून रायगडच्या राजकारणात ही पद्धत सुरू झाली आणि याचाच मोठा फटका २०१४ साली झालेल्या लोकसभा निवडणुकीत विद्यमान खासदार सुनील तटकरे यांना सहन करावा लागला. सुनील तटकरे याच नावाने उभे असलेल्या या उमेदवाराने तब्बल ९ हजार ८४९ मते या उमेदवाराने घेतली आणि तटकरे यांचा केवळ २११० मतांनी पराभव झाला.
२०१४ सालच्या निवडणुकीत विद्यमान खासदार सुनील तटकरे यांना ३ लाख ९४ हजार ६८ तर माजी खासदार अनंत गीते यांना ३ लाख ९६ हजार १७८ मते मिळवली, त्यात अनंत गीते विजयी झाले. २ हजार ११० मतांनी तटकरे पराभूत झाले. याच वेळी उभ्या असलेल्या डमी उमेदवार सुनील तटकरे यांनी ९ हजार ८४९ मते घेतली होती. माझ्याच नावाचा दुसरा उमेदवार उभा नसता तर माझा पराभव झाला नसता अशी खंतही अनेकदा सुनील तटकरे यांनी बोलून दाखवली.
त्यांच्याकडे विचार, निष्ठा नाही, भविष्यात भाजपच्या कमळामध्ये कोणी पहिली उडी मारेल, तर ते तटकरे असतील, रोहित पवारांची टीका
खासदार सुनील तटकरे यांचा राजकीय प्रवास
सुनील तटकरे हे रायगडच्या व राज्याच्या राजकारणातील एक मोठे नाव आहे. सुनील दत्तात्रय तटकरे हे सध्या रायगडमधून लोकसभेचे खासदार म्हणू प्रतिनिधित्व करतात. त्यांनी यापूर्वी राज्याचे जलसंपदा मंत्री म्हणून काम केलंय. विधानसभेत राष्ट्रवादी काँग्रेस पक्षाचे नेते म्हणूनही काम केले आहे. तसेच शरद पवार यांनी त्यांना राष्ट्रवादीच्या प्रदेशाध्यक्षपदीही काम करण्याची संधी दिली.
- १९९५-२००९ माणगाव विधानसभा सदस्य होते.
- २००९-२०१४ श्रीवर्धन विधानसभा मतदारसंघातून विधानसभा सदस्य राहिले आहेत.
- १९ ऑक्टोबर १९९९ – १६ जानेवारी २००३ नगरविकास राज्यमंत्री होते.
- १ नोव्हेंबर २००४ – ४ डिसेंबर २००८ अन्न व नागरी पुरवठा मंत्री म्हणून काम पाहिलं
- ८ डिसेंबर २००८- ६ नोव्हेंबर २००९ ऊर्जा मंत्री म्हणून काम केलं
- ७ नोव्हेंबर २००९- १० नोव्हेंबर २०१० वित्त व नियोजन मंत्री म्हणून कार्यभार सांभाळला
- ११ नोव्हेंबर २०१०- २६ सप्टेंबर २०१४ जलसंपदा मंत्री म्हणून त्यांनी महाराष्ट्रात काम केले आहे.
तटकरे यांचा जन्म १० जुलै १९५५ रोजी सुतारवाडी कोलाड येथे झाला आणि त्यांनी पुण्यातील फर्ग्युसन महाविद्यालयातून इंटर सायन्सपर्यंतचे शिक्षण घेतले. १९८४ मध्ये भारतीय राष्ट्रीय काँग्रेसमध्ये प्रवेश करण्यापूर्वी त्यांनी सरकारी रस्ते कंत्राटदार म्हणून काम केले. १९९५ मध्ये ते काँग्रेस पक्षाच्या तिकिटावर आमदार झाले. पुढे राष्ट्रवादी पक्षाची स्थापना झाल्यानंतर त्यांनी शरद पवार यांच्या नेतृत्वात काम करण्याचे ठरविले. २ जुलै २०२३ रोजी राष्ट्रवादीत फूट पडल्यानंतर त्यांनी अजितदादांच्या नेतृत्वात काम करण्याचे ठरविले.