बुलढाणा: बुलढाण्यात महायुतीमध्ये बिघाडी झाल्याचे समोर आले आहे. महायुतीचे उमेदवार म्हणून प्रतापराव जाधव यांच्या नावाची घोषणा झाल्यानंतरही भाजपचे बुलढाणा लोकसभा प्रमुख माजी आमदार विजयराज शिंदे यांनी आज आपला उमेदवारी अर्ज असंख्य पदाधिकारी आणि कार्यकर्त्यांसह भरला आहे. बुलढाणा लोकसभेत महायुतीचा उमेदवार बदलून बुलढाणा लोकसभा भाजपला द्यावी, अशी मागणी यावेळी विजयराज शिंदे यांनी केली.
अजूनही वेळ गेलेली नाही, पण खेद आहे की…; जयंत पाटलांचे सूचक भाष्य
आपला उमेदवारी अर्ज भरताना विजयराज शिंदे आणि कार्यकर्त्यांनी अंगावर भाजपचे चिन्ह असलेलं उपर्ण होता हे विशेष. एकंदरीत दोन दिवसापूर्वी संजय गायकवाड यांनी प्रतापराव जाधव यांची उमेदवारी जाहीर होण्यापूर्वी उमेदवारी अर्ज दाखल केला. त्या पाठोपाठ मैत्रीपूर्ण लढतीसाठी काँग्रेसचे माजी आमदार हर्षवर्धन सपकाळ हे देखील आपलं मनोगत ट्विटरच्या माध्यमातून मांडलं. त्या पाठोपाठ आता भाजपच्या वतीने देखील स्वतःचा माजी आमदार लोकसभेच्या रिंगणात उतरण्यात उत्सुक असल्याचं दाखवलं जात आहे. नेमकं बुलढाणा लोकसभामध्ये चाललंय तरी काय? महायुतीमध्ये बिघाडी तर नाही ना? आता हे अर्ज मागे घेण्यापर्यंत नाट्य सुरुच राहणार का हे पाहावे लागेल.

महायुतीच्या वतीने शिवसेनेचे शिंदे गटाचे प्रतापराव जाधव उद्या निवडणूक अर्ज दाखल करणार आहेत. बुलढाणा लोकसभा मतदारसंघाचे महायुतीचे अधिकृत उमेदवार प्रतापराव जाधव २ एप्रिल मंगळवार रोजी आपला उमेदवारी अर्ज दाखल करणार आहेत. यावेळी रॅली आणि जाहीर सभेचे आयोजन करण्यात आले आहे. सभेसाठी शिवसेनेचे मंत्री गुलाबराव पाटील तसेच शिवसेनेच्या प्रवक्त्या ज्योतीताई वाघमारे उपस्थित राहणार आहेत. ही सभा सकाळी १० वाजता येथील जिल्हा परिषद मुलांची शाळा, जिल्हा परिषदच्या पाठीमागे मैदानावर घेण्यात येणार आहे. रॅली सकाळी १० वाजता शहरातील जयस्तंभ चौक परिसरातील गांधी भवन येथून काढण्यात येणार आहे.