धनाजी चव्हाण, परभणी: नेहमीचे टोचून बोलणे आणि होत असलेला सामाजिक अपमान सहन न झाल्याने मित्राने श्रीकृष्ण चोपडे याचा कोयत्याने वार करून खून केला. मयत श्रीकृष्ण हा आरोपीच्या नात्यातील एका व्यक्तीच्या पत्नीचे इतरांसोबत असलेले अनैतिक संबंध याची गावामध्ये चर्चा करत होता. मयत हा नेहमीच आरोपींना घालून पाडून बोलत होता. लोकांसमोर अपमान करत होता. या प्रकरणात स्थानिक गुन्हा शाखेने दोन आरोपींना ताब्यात घेतले असून खूनाच्या गुन्हाची उकल करण्यात पोलिसांना यश आले आहे.
१७ लाखांची बाईक अनियंत्रित, डिव्हायडरवर चढली, तारांमध्ये अडकला अन् IIT इंजिनिअरचा भयानक अंत
मिळालेल्या माहितीनुसार, परभणी तालुक्यातील समसापूर शिवारात गुरुवार २८ मार्च रोजी सायंकाळच्या सुमारास एका युवकाचा मृतदेह आढळला होता. स्थानिक गुन्हा शाखेच्या पथकाने ओळख पटविली. श्रीकृष्ण दिगंबर चोपडे या युवकाचा मृतदेह होता. या प्रकरणी अज्ञातावर परभणी ग्रामीण पोलिसात गुन्हा दाखल करण्यात आला. स्थानिक गुन्हा शाखेच्या पथकाने शोध घेत दत्तराव बाबुराव चोपडे, गजानन उत्तमराव चोपडे या दोघांना ताब्यात घेतले. संबंधितांनी सामाजिक अपमानाच्या कारणावरून श्रीकृष्णाचा खून केल्याचे पुढे आले. आरोपींना पुढील तपासासाठी ग्रामीण पोलीसात हजर करण्यात आले आहे.

आरोपींना ताब्यात घेण्याची कारवाई पोलीस अधिक्षक रविंद्रसिह परदेशी, अप्पर पोलीस अधिक्षक यशवंत काळे यांच्या मार्गदर्शनाखाली पोनि. अशोक घोरबांड, सपोनि. पांडुरंग भारती, पोउपनि. बिरादार, वाघमारे, परिहार, पोलीस अंमलदार तुपसुंदरे, जाधव, खान, सातपुते, परसोडे, दुधाटे, भदर्गे, चव्हाण, चाटे, शेख, कौटकर, पठाण, लटपटे यांच्या पथकाने केली. आरोपींना ताब्यात घेऊन चौकशी केली असता घटनेचे कारण पुढे आले. मयत श्रीकृष्ण हा आरोपीच्या नात्यातील एका व्यक्तीच्या पत्नीचे इतरासोबत असलेले अनैतिक संबंध याची गावामध्ये चर्चा करत होता. मयत हा नेहमीच आरोपींना घालून पाडून बोलत होता. लोकांसमोर अपमान करत होता. याचा राग निर्माण आल्याने दत्तराव चोपडे, गजानन चोपडे या दोघांनी मिळून कोयत्याने वार करून श्रीकृष्णाचा खून केला.