म.टा. प्रतिनिधी, नागपूर: उपराजधानीत सोनसाखळी लुटारूंनी दोन तासांत पाच ठिकाणांहून महिलांच्या सोनसाखळ्या हिसकावल्या. एकामागाहून एक घडलेल्या घटनांनी पोलिसांमध्ये प्रचंड खळबळ उडाली असून, महिलांमध्ये दहशतीचे वातावरण आहे. या घटनांनी पोलिसांच्या कार्यक्षमतेवर प्रश्नचिन्ह निर्माण झाले आहे.-पहिली घटना सक्करदरा पोलिस ठाण्याच्या हद्दीत घडली. गुरुवारी सकाळी १०.१५ वाजताच्या सुमारास कांचन सातपुते (रा. जवाहरनगर) या मोपेडवरून शाळेत जात होत्या.

-सक्करदरा परिसरात मोटारसायकलवर आलेल्या दोन युवकांपैकी एकाने त्यांच्या गळ्यातील सव्वा तोळ्याची सोनसाखळी हिसकावली. कांचन यांनी सोनसाखळी पकडली. अर्धी सोनसाखळी हिसकावून लुटारू पसार झाले.

विलासराव देशमुख सरकारमध्ये राज्यमंत्रिपद, शेकापच्या ज्येष्ठ नेत्या मीनाक्षी पाटील यांचे निधन

-दुसरी घटना सकाळी १०.४९ वाजताच्या सुमारास हुडकेश्वर पोलिस ठाण्याच्या हद्दीत उघडकीस आली. प्रीती प्रफुल्ल शिर्के (वय ३६, रा. ताजेश्वरनगर) या मोपेडवरून जात होत्या.

-सर्वश्रीनगर परिसरात मोटारसायकलवर आलेल्या दोन लुटारूंपैकी मागे बसलेल्याने त्यांच्या गळ्यातील १० ग्रॅमची सोनसाखळी हिसकावून पोबारा केला.

-याच परिसरात ११.१५ वाजताच्या सुमारास दुसरी घटना घडली. उर्मिला विनायक तिजारे (वय ७२, रा. सर्वश्रीनगर, दिघोरी) यांच्या गळ्यातील सोनसाखळी हिसकावण्यात आली. उर्मिला यांना सोनसाखळी पकडली. दोन ग्रॅमची तुटलेली सोनसाखळी हिसकावून लुटारू पसार झाले.

-बेलतरोडी पोलिस ठाण्याच्या हद्दीतील साकेतनगर परिसरात चौथी घटना घडली. आशा रामदास थुल (वय ६६) या त्यांच्या डेली नीड्स दुकानासमोर उभ्या होत्या. दुचाकीवर आलेल्या लुटारूंनी त्यांच्या गळ्यातील सोनसाखळी हिसकावली.

-पाचवी घटना सोनेगाव पोलिस ठाण्याच्या हद्दीत १२.५ वाजताच्या सुमारास घडली. विजया ए. दगडे (वय ६३, रा. प्रतापनगर) या डॉक्टरकडे उपचारासाठी जात होत्या. मोटारसायकलवर आलेल्या लुटारूने त्यांच्या गळ्यातील सोनसाखळी हिसकावून पोबारा केला.

-या घटनांनी पोलिसांमध्ये खळबळ उडाली. पोलिसांनी सीसीटीव्ही फुटेज तपासले असता सर्व ठिकाणी एकाच टोळीतील दोघांनी लुटपाट केल्याचे समोर आले. पाचही प्रकरणी पोलिसांनी जबरी चोरीचा गुन्हा दाखल करून तपास सुरू केला आहे.

अजनीत हातोड्याने वार करून लुटली चेन

सोनसाखळी लुटीच्या घटना सुरू असतानाच अजनी पोलिस ठाण्याच्या हद्दीतील बालाजीनगर येथे वृद्ध दाम्पत्याच्या घरात घुसून लुटारूने वृद्धावर हातोड्याने वार केले. वृद्धेच्या गळ्यातील सोनसाखळी हिसकावली. ही घटना गुरुवारी सकाळी १०.३० वाजताच्या सुमारास घडली. या घटनेने परिसरातील रहिवाशांमध्ये दहशतीचे वातावरण आहे. रमेश नेहते (वय ८०) असे जखमीचे नाव आहे. सकाळी रमेश व त्यांच्या पत्नी इंदुमती (वय ७६) या घरी होत्या. युवक त्यांच्या घरात घुसला. त्याने इंदुमती यांच्या गळ्यातील सोनसाखळी हिसकावण्याचा प्रयत्न केला. रमेश यांनी विरोध केला असता युवकाने हातोड्याने त्यांच्यावर वार केले. इंदुमती यांच्या गळ्यातील सोनसाखळी हिसकावून युवक पसार झाला. याप्रकरणी अजनी पोलिसांनी जबरी चोरीचा गुन्हा दाखल करून तपास सुरू केला आहे.