मुंबई : बॉलिवूड अभिनेता गोविंदा अहुजा यांनी एकनाथ शिंदे यांच्या नेतृत्वाखालील शिवसेना पक्षात प्रवेश करून राजकारणातील कारकीर्दीचा दुसऱ्यांदा श्रीगणेशा केला. मुंबईतील उत्तर पश्चिम मतदारसंघातून त्यांना लोकसभेची उमेदवारी मिळणार आहे. गेल्या आठवड्यात अभिनेता गोविंदा अहुजा यांनी मुख्यमंत्री एकनाथ शिंदे यांची भेटी घेतली होती. तेव्हाच त्यांच्या पक्षप्रवेशावर शिक्कामोर्तब झाले होते. गुरुवारी अखेर त्यांनी भगवा हाती घेऊन एकनाथ शिंदे यांच्या नेतृत्वाखाली जी जबाबदारी मिळेल, ती निभाविण्याचा निर्धार व्यक्त केला. प्रवेश करताक्षणी शिंदे यांनी गोविंदांची स्टार प्रचारक म्हणून घोषणा केली. अधोरेखित करण्यासारखी गोष्ट म्हणजे गोविंदाने भाजपच्या राम नाईक यांचा पराभव केलेला होता.
उत्तर पश्चिम मतदारसंघासाठी शिवसेना उद्धव बाळासाहेब ठाकरे पक्षाने अमोल कीर्तीकर यांना उमेदवारी दिली आहे. त्याच वेळी त्यांच्याविरोधात महायुतीकडून कोणत्याही उमेदवाराची घोषणा करण्यात आलेली नाही. अखेर गुरूवारी गोविंदा अहुजा यांनी बाळासाहेब भवन येथे शिंदे गटात प्रवेश करून निवडणूक लढविण्याचे संकेत दिले.
मुंबईतील उत्तर पश्चिम मतदारसंघाचे खासदार गजानन कीर्तीकर सध्या शिंदे गटात असल्याने याठिकाणी शिंदे गटाला ही जागा सोडण्यात येणार आहे. परंतु गजानन कीर्तीकर यांचे वय लक्षात घेता त्यांना पुन्हा संधी दिली जाणार नाही. त्यांचे सुपुत्र अमोल कीर्तिकर यांना ठाकरेंनी उमेदवारी दिली आहे. याच ठिकाणाहून लढण्यासाठी शिंदे गट उमेदवार शोधत होता. गोविंदा यांच्या पक्षप्रवेशाने ते निवडणुकीच्या रिंगणात असतील, हे निश्चित झाले आहे.
एकनाथ शिंदे हे मुख्यमंत्री झाल्यापासून मुंबईत सुशोभीकरण वाढले आहे. विकासकामांची गती वाढली आहे. मला त्यांचे आकर्षण आहे. त्यांच्या नेतृत्वात काम करण्याची संधी मला मिळाली, त्याचा आनंद आहे, असे गोविंदा म्हणाले. पंतप्रधान नरेंद्र मोदी यांच्यासारखीच एकनाथ शिंदे यांची प्रतिमा स्वच्छ आहे.
डाऊन टू अर्थ असणारे आणि सगळ्याच समाजामध्ये लोकप्रिय असणारे गोविंदाजी यांचं पक्षात स्वागत करतो आणि त्यांचं अभिनंदन देखील करतो. आम्ही केलेल्या कामांचा त्यांच्यावर प्रभाव आहे. कुठल्याही अटीशर्थींविना त्यांनी शिवसेना पक्षात प्रवेश केला आहे, असे मुख्यमंत्री एकनाथ शिंदे यांनी सांगितले.