बेळगाव (नयन यादवाड) : लोकसभा निवडणूकीची रणधुमाळी सध्या देशभर जोरदार सुरू आहे. राजकीय पक्षांकडून उमेदवारांची घोषणा करण्यात येत आहे. तर गेल्या कित्येक वर्षांपासून मराठी अस्मितेची लढाई सुरू असलेल्या बेळगाव जिल्ह्यात महाराष्ट्र एकीकरण समिती पुन्हा एकदा मैदानात उतरणार आहे. यामुळे बेळगाव जिल्ह्यात पुन्हा एकदा मराठी भाषकांचा आवाज पुन्हा घुमणार आहे. येत्या दोन दिवसात बेळगावमध्ये महाराष्ट्र एकीकरण समितीची बैठक पार पडणार असून या बैठकीनंतर उमेदवार आणि कोणत्या लोकसभा मतदारसंघात उमेदवार द्यायचा या संदर्भात घोषणा करण्यात येणार आहे.
एकीकरण समिती मैदानात
आगामी लोकसभा निवडणुकीत बेळगाव जिल्ह्यात महाराष्ट्र एकीकरण समिती देखील निवडणूक रिंगणात उतरत आहे. महाराष्ट्र कर्नाटक सीमावाद हा गेल्या अनेक वर्षांपासून सुरू आहे. आणि याची धग सीमा भागातील मराठी भाषिकांना बसत आहे. यासाठी महाराष्ट्र एकीकरण समितीकडून केली अनेक वर्ष लढा दिला जात आहे. बेळगाव निपाणी भालकी सहसंयुक्त महाराष्ट्र झालाच पाहिजे. यासाठी महाराष्ट्र एकीकरण समितीच्या मार्फत मराठी भाषिक हा लढा देत आहेत.
एकेकाळी महाराष्ट्र एकीकरण समितीचे बेळगाव जिल्ह्यात वर्चस्व पाहायला मिळत होत. मात्र संघटनेतील अंतर्गत गटबाजी आणि सत्ताधाऱ्यांकडून मराठी भाषकांचा मतदारसंघ फोडत मराठी भाषिकांना विभागून टाकण्याचा केलेला प्रयत्न यामुळे महाराष्ट्र एकीकरण समिती सध्या दुर्बळ झाली असली तरी त्यांचा प्रभाव अद्याप देखील बेळगाव जिल्ह्यात अनेक मतदारसंघात पाहायला मिळतो. यामुळे मराठी भाषेचा साठी महाराष्ट्र एकीकरण समिती पुन्हा एकदा लोकसभा निवडणुकीच्या रिंगणात उतरत आहे.
येत्या दोन दिवसात महाराष्ट्र एकीकरण समितीचे बेळगाव जिल्ह्यात बैठक पार पडणार असून या बैठकीत उमेदवार जाहीर करण्यात येणार आहे. २०२१ मध्ये झालेल्या बेळगाव लोकसभा पोटनिवडणुकीत लक्ष वेधून घेतलेल्या २६ वर्षीय शुभम शेळके या उमेदवाराने सव्वा लाख मतांचा आकडा गाठला होता.यामुळे यंदाही महाराष्ट्र एकीकरण समिती शुमभ शेळके यांनाच मैदानात उतरवण्याच्या विचारधिन असल्याची माहिती आहे.
महाराष्ट्र एकीकरण समिती निवडणुका ही एक चळवळ म्हणून लढत असते. यावेळी मला उमेदवारी मिळाली होती आणि मतदान देखील चांगले झाले होते. यामुळे येत्या दोन ते तीन दिवसात आमची बैठक पार पडणार आहे. आणि या बैठकीत उमेदवार द्यायचा की नाही आणि कोठे द्यायचा या संदर्भात चर्चा होणार आहे आणि यानंतर कार्यकर्ते उतरून कामाला लागतील. विधानसभेत आम्हाला आलेला पराभव यामुळे कार्यकर्ते मरगलेले आहेत मात्र ही मरगळ झटकण्याची संधी आहे. कर्नाटक सरकारने कन्नड सक्ती करत असल्याने मराठी भाषिकांना निर्माण झालेली चीड दूर करण्याची ही संधी आहे.
– शुभम शेळके,महाराष्ट्र एकीकरण समिती
अशी आहे २०१९ आणि २०२१ ची राजकीय स्थिती
बेळगाव लोकसभा मतदारसंघात एकूण आठ विधानसभा मतदारसंघ आहेत यापैकी पाच काँग्रेसचे आमदार असून तीन भाजपचे आमदार येथे आहेत. यामुळे सध्या येते काँग्रेसची ताकद अधिक आहे. २०१९ साली पार पडलेल्या निवडणुकीत बीजेपी चे उमेदवार सुरेश अंगडी यांनी ७ लाख ६१ हजार ९९१ मध्ये येत विजय मिळवला होता तर त्यांच्या विरोधात उभारलेले व्ही एस साधून्नावर यांना ३ लाख ७० हजार ६८७ मते मिळवली होती यावेळी येथे महाराष्ट्र एकीकरण समितीने सीमा प्रश्नाकडे केंद्र सरकारचे लक्ष वळवण्यासाठी ४८ उमेदवार लोकसभेसाठी उभे करत तब्बल ५० हजारांपेक्षा जास्त मतं मिळवली होती. तर कोरोना काळात सुरेश अंगडी यांचे निधन झाल्याने २०२१ मध्ये लागलेल्या पोटनिवडणुकीत महाराष्ट्र एकीकरण समितीने शुभम शेळके यांना उमेदवारी देत उमेदवार उभा केला होता.
या निवडणुकीत महाराष्ट्र एकीकरण समितीने काटे की टक्कर दिली होती. मात्र प्रमुख लढत ही भाजप आणि काँग्रेस मध्ये झाली यावेळी भाजपचे मंगला अंगडी यांनी ४ लाख ४० हजार ३२७ इतके मतदान घेत विजय मिळवला होता. तर काँग्रेस उमेदवार सतीश जारकीहोळी यांनी ४ लाख ३५ हजार ०८७ मते घेतली होती. तर महाराष्ट्र एकीकरण समितीने १ लाख ०१७ हजार १७४ इतकी लक्षवेधी मते घेतली होती. यामुळे यंदाच्या निवडणुकीत देखील शुभम शेळके यांचे नाव आघाडीवर असून येत्या २ ते ३ दिवसात बेळगावमध्ये बैथक घेऊन अंतिम निर्णय घेण्यात येणार आहे.