म.टा. प्रतिनिधी, नागपूर : लिव्ह इन रिलेशनशिपमध्ये राहणाऱ्या प्रेयसीची प्रियकराने गळा आवळून हत्या केली. ही घटना जरीपटका पोलिस ठाण्याच्या हद्दीत तपासादरम्यान उघडकीस आली. पोलिसांनी खुनाचा गुन्हा दाखल करून मारेकरी प्रियकराला अटक केली.

काय आहे प्रकरण?

गंगाधर अर्जुन घरडे (रा. एनआयटी गार्डनजवळ, जरीपटका) असे अटकेतील मारेकऱ्याचे नाव आहे. सोनू (बदललेले नाव) असे मृतकाचे नाव आहे. गंगाधर हा पेटिंगची कामे करतो. पोलिसांनी दिलेल्या माहितीनुसार, २००६मध्ये सोनूचे लग्न झाले. लग्नानंतर दहा वर्षांनी ती पतीला सोडून माहेरी आली. यादरम्यान तिची गंगाधरसोबत ओळख झाली. २०१९मध्ये सोनू ही गंगाधरला भेटायला गेली. ती घरी परतली नाही. ती गंगाधरसोबत लिव्ह इनमध्ये राहायला लागली. गंगाधरचे लग्न झाले असून, त्याला दोन मुली आहेत. गंगाधरचा पहिल्या पत्नीसोबत असलेला वाद न्यायालयात सुरू असल्याचे सोनूला कळाले. त्यामुळे सोनू व गंगाधरमध्ये वाद झाला. २०२३मध्ये ती माहेरी परतली. काही दिवसांनी गंगाधर हा सोनूला भेटायला आला. समजूत घालून तिला परत घरी घेऊन गेला. त्यानंतर चारित्र्यावर संशय घेऊन गंगाधर हा सोनूला मारहाण करायला लागला. २ मार्चला सकाळी गंगाधरने सोनूला मारहाण केली. गळा आवळून तिचा खून केला. तिने आत्महत्या केल्याचे भासवले.
पत्नीचं प्रेमप्रकरण, पतीला राग अनावर अन् घडलं भयंकर, बारामतीत तरुणाची दिवसाढवळ्या हत्या
आरोपीला तीन दिवसांची कोठडी

जरीपटका पोलिसांनी आकस्मिक मृत्यूची नोंद करून तपास सुरू केला. गळा आवळून व लोखंडी वस्तूने मारल्याने सोनूचा मृत्यू झाल्याचे शवविच्छेदन अहवालात स्पष्ट झाले. या अहवालाच्या आधारे पोलिसांनी खुनाचा गुन्हा दाखल करून गंगाधरला अटक केली. त्याला न्यायालयात हजर केले. न्यायालयाने त्याची तीन दिवसांसाठी पोलिस कोठडीत रवानगी केली.