मुंबई : महाविकास आघाडीचे घटक असलेले राष्ट्रवादी काँग्रेस (शरदचंद्र पवार) आणि शिवसेना उद्धव बाळासाहेब ठाकरे हे दोन्ही पक्ष घराणेशाहीच्या राजकारणासाठी आमचा उपयोग करीत आहेत, असा गंभीर आरोप करून वंचित बहुजन आघाडीचे अध्यक्ष प्रकाश आंबेडकर यांनी मनोज जरांगेंशी ‘समाजिक युती’ करून लोकसभा निवडणूक लढविणार असल्याची घोषणा केली. महाविकास आघाडीतून बाहेर पडल्यानंतर गुरुवारी दुपारी प्रकाश आंबेडकर यांनी शिवसेना नेते संजय राऊत यांच्याविरोधात सणसणीत ट्विट केले. खंजीर खुपसणाऱ्या हातावर संजय राऊत लिहून मला अकोल्यात पाडण्याचा प्लॅन होता, सिल्वर ओकवरील बैठकीत काय चर्चा झाली, हे मला माहिती आहे, असा सनसनाटी गौप्यस्फोट करून आंबेडकरांनी राऊतांवर प्रश्नांची सरबत्ती केली.लोकसभा निवडणुकीत महाविकास आघाडीसोबत न जाता मनोज जरांगे यांच्याशी युती करून तिसरी आघाडी स्थापन करण्याची भूमिका प्रकाश आंबेडकर यांनी स्पष्ट केली. त्यानंतर गुरुवारी दुपारी शिवसेना खासदार, महाविकास आघाडीचे नेते संजय राऊत यांच्यावर गंभीर आरोप करणारे ट्विट प्रकाश आंबेडकर यांनी केले. या ट्विटमधून त्यांनी राऊतांवर प्रश्नांचा भडीमार केला.
प्रकाश आंबेडकर यांच्याकडून संजय राऊत आणि मविआवर प्रश्नांचा भडिमार
संजय आणखी किती खोटं बोलणार… तुमची आणि माझी मते सारखीच असतील तर तुम्ही आम्हाला बैठकीला का बोलावत नाही? फोर सीझन्स हॉटेलमध्ये ६ मार्चला झालेल्या बैठकीनंतर तुम्ही आमच्या कोणत्याही प्रतिनिधीला का बोलावले नाही? वंचितला आमंत्रण न देता आजही सभा का घेत आहात? तुम्ही मित्रपक्ष होऊन पाठीत खंजीर खुपसला आहे.
राज्यात पुन्हा तिसरी आघाडी? वंचितच्या गोटात वेगवान हालचाली; आंबेडकरांना कोणाकोणाची साथ?
सिल्व्हर ओक्स येथील बैठकीमध्ये तुम्ही काय भूमिका घेतली होती, हे आम्हाला माहिती आहे. अकोल्यात आमच्या विरोधात उमेदवार उभा केल्याचा मुद्दा तुम्ही उपस्थित केला हे खरे नाही का? तुम्ही कोणत्या प्रकारचे युती करत आहात? एकीकडे युतीचा आभास दाखवून दुसरीकडे आम्हाला पाडण्याची कारस्थाने आपण करत आहेत. हे तुमचे विचार आहेत? अशा प्रश्नांचा भडीमार आंबेडकर यांनी केला.
आंबेडकरांनी महाविकास आघाडीवर बोलणे टाळले, प्रश्नांना उत्तरेच दिली नाहीत
प्रकाश आंबेडकर यांनी बुधवारी पहाटे मनोज जरांगे यांची भेट घेतली. त्या भेटीनंतर घेतलेल्या पत्रकार परिषदेत आंबेडकरांनी थेट उमेदवारांची यादीच जाहीर केली. यावेळी आंबेडकर महाविकास आघाडीबद्दल काही बोलतील, अशी आशा होती. त्यांनी जरांगे पाटील यांच्यासोबत झालेल्या बैठकीचा तपशील उलगडला. वंचितच्या उमेदवारांची पहिली यादी जाहीर केली. पण, महाविकास आघाडीविषयी बोलण्याचे टाळले. या विषयावरील प्रश्नांनाही पत्रकार परिषदेत उत्तरे दिली नाही.