चंद्रशेखर बावनकुळे यांच्या कोराडी येथील जनसंपर्क कार्यालयात त्यांचा पक्ष प्रवेश झाला. यावेळी त्यांच्यासोबत त्यांचे पती आमदार रवी राणा यांच्यासह मोठ्या संख्येने कार्यकर्ते उपस्थित होते. खा. राणा म्हणाल्या की, मोदीजींच्या विचारावर मी मागील अनेक वर्षांपासून काम करीत आहे. मला अमरावती मतदारसंघातून उमेदवारी दिल्याबद्दल पंतप्रधान नरेंद्र मोदी, गृहमंत्री अमित शाह, भाजपाचे राष्ट्रीय अध्यक्ष जे.पी. नड्डा, राज्याचे नेते तसेच उपमुख्यमंत्री देवेंद्र फडणवीस व भाजपाचे प्रदेशाध्यक्ष चंद्रशेखर बावनकुळे यांचे आभार त्यांनी व्यक्त केले.
नवनीत राणा यांचा निर्धार
भारतीय जनता पक्षात एक सामान्य कार्यकर्ता म्हणून काम करणार आहे. विरोधी पक्षात असताना ३३ महिने लढा दिला, आमची विचारधारा एक असल्याने आम्ही वेगळे होऊ शकत नाही. भाजपाच्या ४०० पार च्या संकल्पात अमरावतीची खासदार म्हणून मी एक असेल, असेही त्या म्हणाल्या.
युवा स्वाभिमान पक्षाचा राजीनामा
पती आणि युवा स्वाभिमान पक्षाचे संस्थापक अध्यक्ष रवी राणा यांना पत्र लिहित नवनीत राणा यांनी पक्षाच्या राष्ट्रीय महिला कार्याध्यक्ष आणि प्राथमिक सदस्यत्वाचा राजीनामा दिला. मात्र नवनीत राणांच्या पक्षप्रवेशाने मित्रपक्ष शिवसेनेचे आनंदराव अडसूळ, प्रहारचे बच्चू कडू यांची नाराजी ओढवण्याची शक्यता आहे.
प्रदेशाध्यक्ष बावनकुळे म्हणाले, पंतप्रधान नरेंद्र मोदी यांच्या विकसित भारताच्या संकल्पाला साथ देण्यासाठी खासदार नवनीत राणा यांनी त्यांच्या असंख्य कार्यकर्त्यांसह भाजपात प्रवेश घेतला आहे. त्यांचा पक्ष प्रवेश भाजपा संघटनेला मजबुती प्रदान करणारा असेल. नवनीत राणा या अमरावती नव्हे तर विदर्भ व महाराष्ट्राच्या नेत्या असतील.
Read Latest Maharashtra News Updates And Marathi News
यावेळी विदर्भ संघटक डॉ. उपेंद्र कोठेकर, खा. अनिल बोंडे, खा. सुनील मेंढे, आ. प्रवीण पोटे, आ. रवी राणा, शिवराय कुळकर्णी, जयंत डेहनकर यांच्यासह अमरावतीतील भाजपाचे प्रमुख पदाधिकारी व राणा यांचे असंख्य समर्थक उपस्थित होते.