म. टा. प्रतिनिधी, छत्रपती संभाजीनगर : महापालिकेची उस्मानपुरा येथील प्राथमिक आणि सीबीएसई पॅटर्न पहिली सोलार शाळा ठरली आहे. कॅनफिन होम लिमीटेड या बँकेच्या सीएसआर फंडातून शाळेवर ‘रूफ टॉप सोलार’ बसवण्यात आले.

महापालिकेच्या शाळा स्मार्ट शाळा बनाव्यात यासाठी प्रयत्न केले जात आहेत. यासाठी स्मार्ट सिटी डेव्हलपमेंट कॉर्पोरेशनच्या माध्यमातून काम केले जात आहे. स्मार्ट क्लास रूम, डिजिटल क्लास रूम तयार करण्यासह शाळेचा परिसर देखील स्मार्ट करण्याचा प्रयत्न केला जात आहे. प्रत्येक शाळेसाठी रूफ टॉप सोलार चे नियोजन करण्यात आले आहे. सोलार प्रकल्पामुळे शाळा स्वयंपूर्ण होतील. शाळेसाठीच्या वीजेच्या बिलात बचत होईल असे मानले जात आहे. याच पार्श्वभूमीवर उस्मानपुरा येथील प्राथमिक व सीबीएसई पॅटर्नच्या शाळेवर कॅनफिन होम लिमीटेड या बँकेच्या सीएसआर फंडातून शाळेच्या गच्चीवर सोलार पॅनल बसवण्यात आले आहेत. बसवण्यात आलेल्या सोलार पॅनलचे उद्घाटन नुकतेच करण्यात आले.
Holi 2024: जळो सर्व दोष, जळो सर्व ईर्ष्या; आज होलिकादहन, उद्या धूळवड
यावेळी बँकेच्या अधिकाऱ्यांसह शिक्षणाधिकारी भारत तिनगोटे, केंद्रीय मुख्याध्यापक संजीव सोनार, सीबीएसई पॅटर्नच्या शाळेचे मुख्याध्यापक शशिकांत उबाळे, प्राथमिक शाळेचे मुख्याध्यापक बाळा जाधव, शिक्षक उपस्थित होते. सोलार प्रकल्पामुळे शाळेतील टीव्ही, संगणक लॅब, विजेवर चालणारी सर्व उपकरणे आता सौर उर्जेवर चालणार आहेत. त्यामुळे वीज बिलात मोठी बचत होईल असे मानले जात आहे. सोलार पॅनलच्या उद्घाटनाच्या कार्यक्रमाचे सुत्रसंचालन पूजा कुमार यांनी केले. शिक्षणाधिकारी भारत तिनगोटे यांनी या उपक्रमाला शुभेच्छा दिल्या.