भंडारा : प्रदेशाध्यक्ष या नात्याने संपूर्ण महाराष्ट्रात कॉंग्रेसचे सर्वाधिक खासदार निवडून आणण्याची जबाबदारी माझी आहे. काँग्रेस उमेदवारांच्या प्रचारासाठी संपूर्ण महाराष्ट्र पिंजून काढावे लागणार आहे. त्यामुळे मला एकट्या भंडारा-गोंदिया लोकसभा मतदारसंघापुरते अडकवून ठेवू नका, असे आवाहन काँग्रेस प्रदेशाध्यक्ष नाना पटोले यांनी केले आहे. त्यांच्या या वक्तव्यामुळे पटोले हे भंडारा-गोंदिया लोकसभेची निवडणूक लढणार नसल्याचे मानले जात आहे.
भंडार-गोंदिया लोकसभा मतदारसंघाच्या प्रमुख पदाधिकाऱ्यांची बैठक शुक्रवारी साकोली येथे आयोजित करण्यात आली होती. या बैठकीला माजी राज्यमंत्री बंडू सावरबांधे, माजी आमदार अनिल बावनकर, जिल्हा परिषद अध्यक्ष गंगाधर जिभकाटे, काँग्रेसचे जिल्हाध्यक्ष मोहन पंचभाई व भंडारा-गोंदिया लोकसभा मतदारसंघातील काँग्रेसचे प्रमुख पदाधिकारी उपस्थित होते.
या बैठकीत काँग्रेस पदाधिकाऱ्यांनी आ. नाना पटोले यांना या मतदारसंघातून निवडणूक लढवावी, अशी भावना व्यक्त केली. त्यावर पटोले यांनी मला एका क्षेत्रापुरते अडकवून न ठेवता पक्ष जो उमेदवार देईल त्याच्या पाठीशी सर्वांनी खंबीरपणे व एकमताने उभे राहण्याचे आवाहन केले.
गेल्या अनेक दिवसांपासून प्रदेशाध्यक्ष पटोले हे या मतदारसंघातून निवडणूक लढणार असल्याचे सांगण्यात येत होते. काँग्रेस हायकमांडने त्यांच्या नावावर शिक्कामोर्तब केल्याचेही वृत्त होते. परंतु आता खुद्द पटोले यांनी ही शक्यता फेटाळून लावली आहे. पटोले निवडणूक लढणार नसल्याने भंडारा-गोंदियातील इच्छुकांचा जीव भांड्यात पडला आहे. आता काँग्रेसकडून कुणाला उमेदवारी मिळणार, याकडे मतदारांचे लक्ष लागून आहे.