म. टा. प्रतिनिधी मुंबई : सणासुदीसह सुट्टीच्या कालावधीत प्रवासासाठी खासगी बसला प्रवाशांची पसंती असते. प्रवासी मागणी लक्षात घेऊन वाजवीपेक्षा अधिक भाडे वसूल करणे, प्रवासी सुरक्षेत तडजोड करणे, अतिरिक्त प्रवासी बसवणे आणि अन्य नियमांचे उल्लंघन करणाऱ्या खासगी बस ट्रॅव्हल्सकडे प्रादेशिक परिवहन कार्यालयाने (आरटीओ) मोर्चा वळवला आहे. मुंबई पूर्व (वडाळा) आरटीओने १,२१८ बसगाड्यांची तपासणी केली असता, सुमारे ४८ टक्के अर्थात ५८९ गाड्या सदोष असल्याचे स्पष्ट झाले आहे. मात्र अशाप्रकारच्या सदोष वाहनांमुळे प्रवाशांचा जीव धोक्यात घालून ही वाहतूक होत असल्याने चिंता व्यक्त केली जात आहे.रेल्वेगाड्यांचे आरक्षण चार महिने आधी खुले होते. राज्य परिवहन महामंडळाच्या वातानुकूलित, शयनयान बसगाड्यांची संख्या कमी असल्याने त्या नेहमी पूर्ण आरक्षणाने धावतात. यामुळे खासगी ट्रॅव्हल्सने प्रवास करण्याचा पर्याय प्रवाशांसमोर येतो.

निवडणूक आयोगाचे ‘स्वीप’अभियान, मतदारांमध्ये जनजागृती करा, अडीच हजार सेलिब्रिटींना पत्र

रिफ्लेक्टर नसल्याने कारवाई

वडाळा आरटीओने १,२१८ खासगी ट्रॅव्हल्सची तपासणी केली आहे. यातील ५८९ वाहने सदोष असल्याचे आढळून आले आहे. विनापरवाना वाहनप्रकरणी १५८, रात्रीच्या वेळी अत्यंत गरजेचे असलेल्या रिफ्लेक्टर नसल्याने ११८ वाहनांवर कारवाई करण्यात आली आहे. दोषी वाहनचालक-मालकांकडून १२.९० लाखांचा दंड वसूल करण्यात आला आहे, असे वडाळा प्रादेशिक परिवहन अधिकारी विनय अहिरे यांनी सांगितले.

अग्निशमन यंत्रणेचा अभाव

उन्हाळ्यात वाहनांना आग लागण्याच्या घटना सातत्याने घडत असतात. अशा वेळी वाहनांमध्ये वैध अग्निशमन यंत्रणा असल्यास वेळीच आग आटोक्यात आणणे शक्य होते. यामुळे खासगी ट्रॅव्हल्समधील अग्निशमन यंत्रणेची तपासणी केली असता १०८ बसमध्ये अग्निशमन यंत्रणा नसल्याचे समोर आले आहे. याप्रकरणी संबंधितांवर कारवाई करून वैध यंत्रणा बसवण्याचे आदेश देण्यात आले आहे.

आपात्कालीन मार्ग बंद

शयनयान श्रेणीच्या बसमध्ये आपत्कालीन मार्ग बंद केलेल्या १६ बसगाड्यांवरही दंडात्मक कारवाई केली आहे. तसेच प्रवासी सुरक्षिततेसाठी मार्ग मोकळा ठेवण्याच्या सूचना खासगी ट्रॅव्हल्स चालक-मालकांना करण्यात आल्या आहेत.

वडाळा आरटीओ

एकूण तपासणी – १२१८

सदोष वाहने – ५८९

विनापरवाना वाहने – १५८

रिफ्लेक्टर नसणे – १०८

एकूण दंडवसुली – १२.९० लाख