पुणे : उपमुख्यमंत्री अजित पवार आणि पवार कुटुंबियांवर सतत खोचक टीका करणं मुख्यमंत्री एकनाथ शिंदे यांच्या नेतृत्वातील शिवेसेनेचे नेते विजय शिवतारे यांना अडचणीचे ठरणार आहे. कारण विजय शिवतारे यांनी युतीधर्म पाळला नाही, तर त्यांच्यावर शिस्तभंगाची कारवाई करण्याच्या सूचना वरिष्ठ नेत्यांकडून देण्यात आल्याची माहिती समोर आली आहे. यामुळे विजय शिवतारे यांच्या अडचणीत वाढ होण्याची शक्यता वर्तवली जात आहे.

बारामती लोकसभा मतदारसंघात राष्ट्रवादीकडून अजित पवार यांच्या पत्नी सुनेत्रा पवार आणि विद्यमान खासदार सुप्रिया सुळे अशी लढत होणार आहे. त्यात विजय शिवतारे यांनी अपक्ष लढणार असल्याची भूमिका जाहीर केली आहे. ते बारामतीचा दौरा करत असताना जिथे जातील तिथे अजित पवार यांच्यावर टीका करताना पहायला मिळत आहेत.

माझी भूमिका ठरलेली असून मी त्यावर ठाम असल्याचे विजय शिवतारे यांनी वरिष्ठांशी चर्चा केल्यानंतरही सांगितले होते. त्यानंतरही त्यांनी अजित पवार यांच्यावर टीका करणे थांबवलेले नाही. त्यामुळे येणाऱ्या काळात महायुतीच्या उमेदवाराला धोक्याचे ठरू शकते. त्यामुळे वरिष्ठांकडून शिस्तभंग कारवाईचे आदेश देण्यात आल्याचे सांगण्यात येत आहे.
बारामतीत दडपशाही, रोहित-युगेंद्र पवारांना सुरक्षा द्या, सुप्रिया सुळेंचं पोलीस अधीक्षकांना पत्र
काल मुख्यमंत्री एकनाथ शिंदे यांनी मुंबईत लोकसभा निवडणुकी संदर्भात आढावा बैठकीचे आयोजन केलं होतं. या बैठकीला विजय शिवतारे यांना हजर राहण्याचं सांगण्यात आलं होतं. मात्र शिवतारे या बैठकीकडे फिरकले पण नाहीत.

लोकसभा निवडणूक आढावा बैठकीत शिवतारे हे न पोहोचल्याने मंत्री शंभूराज देसाई यांना याप्रकरणी लक्ष घालण्यास सांगण्यात आलं, मात्र विजय शिवतारेंचा फोन बंद येत होता. परिणामी शिवतारेंशी संपर्क होऊ शकला नाही. याचाच अर्थ शिवतारे हे आपल्या भूमिकेवर ठाम आहेत असं समजलं गेलंय.
एकदा ठरलं की ठरलं, धंगेकरांना तिकीट मिळताच वसंत मोरेंचं WhatsApp स्टेटस, पुण्यात तिरंगी लढत
आता शिवतारेंना ‘वर्षा’वर बोलवून वारंवार समज देऊनही महायुती विरोधी भूमिका घेतल्याने त्यांच्यावर आज शिस्तभंगाची कारवाई होईल असं म्हटलं जात आहे. काल वरळी येथे झालेल्या लोकसभा निवडणूक आढावा बैठकीत या अनुषंगाने चर्चा पण करण्यात आली. मुख्यमंत्र्यांनी सांगूनही जर शिवतारे ऐकत नसतील तर त्यांच्यावरती शिस्तभंगाची कारवाई करण्याची सूचना मुख्यमंत्र्यांनी दिली असल्याची खात्रीलायक सूत्रांकडून समजतंय.

विजय शिवतारे हे उद्या इंदापूर तालुक्यात दौऱ्यावर येणार असून तिथे ते हर्षवर्धन पाटील यांची भेट घेणार असल्याचे बोलले जात आहे. त्यामुळे त्याकडेही सर्वांचे लक्ष लागले आहे.
Read Latest Maharashtra News Updates And Marathi News

गेल्या काही दिवसांपासून विजय शिवतारे हे बारामती लोकसभा मतदारसंघात दौरे करत आहेत. दोन दिवसांपूर्वी त्यांनी भोर येथे अनंतराव थोपटे यांची भेट घेतली होती. त्यातही त्यांनी अनंतराव थोपटे यांना शरद पवार यांनी कसा तुमचा पराभव केला याची आठवण करून दिली होती. त्यामुळे विजय शिवतारे हे वरिष्ठांचे ऐकत नसल्याची माहिती समोर आली आहे. त्यातूनच ही कारवाई होणार असल्याचे बोलले जात आहे. कारवाई झाली तर विजय शिवतारे हे काय भूमिका घेणार हे पाहणे आता महत्वाचे ठरणार आहे.