सांगली: महाविकास आघाडीकडून अद्याप जागवाटपाचे सूत्र अद्याप जाहीर झाले नसताना शिवसेना ठाकरे गटाचे प्रमुख उद्धव ठाकरे यांनी सांगली लोकसभा मतदारसंघातून चंद्रहार पाटील यांची उमेदवारी जाहीर केली. या मतदारसंघावर काँग्रेस पक्ष दावा करत असताना उद्धव ठाकरे यांनी भर जाहीर सभेत उमेदवाराची घोषणा केल्याने आता काँग्रेसकडून काय प्रतिक्रिया येते हे पाहणे उत्सुकतेचे ठरणार आहे.

महाविकास आघाडीतून सांगलीची जागा शिवसेना ठाकरे गटाला दिल्याची चर्चा गेल्या काही दिवसांपासून आहे. उद्धव ठाकरे यांनी चंद्रहारच्या नावाची घोषणा करताना आता आपली भेट चंद्रहारच्या विजयी मेळाव्यात होईल असा विश्वास बोलून दाखवला.

भाजपवर जहरी टीका

उद्धव ठाकरे यांनी यावेळी भाजपवर जहरी टीका केली. त्यांनी भाजपची तुलना कचरा गोळा करणऱ्या गाडीशी केली. उद्धव ठाकरे म्हणाले, थोडक्यात भाजपची परिस्थीत कचरा गोळा करणाऱ्या गाडीसारखी झाली आहे. आणि आता तर शिमगाच आहे. होळी म्हटल्यावर आपण घरातील नको असलेल्या गोष्टी बाहेर आणून ठेवतो. म्हणजे होळी करणारे ते चोरून नेतात, अशी भाजपची अवस्था झाली आहे. आमचेच सामान घेऊन जायचे आणि त्यावर होळी पेटवायची आणि बोंबा आमच्या नावाने मारायच्या, असा यांचा शिमगा आहे. त्यांनी जरी शिमगा करायचा ठरवला असला तरी भाजपच्या दहा वर्षाच्या नतद्रष्ट राजवटीची होळी आपल्याला करावीच लागेल आणि त्यासाठीच मी सांगलीत आलो आहे, अशा शब्दात उद्धव ठाकरे यांनी भाजपवर हल्ला चढवला.

उद्धव ठाकरेंच्या भाषणातील महत्त्वाचे मुद्दे
>चंद्रहारची अस्सल गदा माझी जनता आहे. जोपर्यंत ही गदा सोबत आहे, तोपर्यंत प्रतिस्पर्ध्यांची चिंता नाही
> मतभिन्नता तेव्हाही होती. पण शिवसेनेने, शिवसेनाप्रमुखांनी कधीच सुडाचे राजकारण केले नाही

काँग्रेसचे आमदार डॉ.विश्वजित कदम यांनी येथून विशाल पाटील हेच उमेदवार असतील असे म्हटले होते. सांगली लोकसभा मतदारसंघातून २०१९ साली भाजपच्या संजय पाटील यांच्या विरोधात विशाल पाटील हे स्वाभिमानी शेतकरी संघटनेकडून लढले होते. तेव्हा विशाल पाटील यांचा पराभव झाला होता. त्याआधी २०१४मध्ये हा मतदारसंघ काँग्रेसकडे होता आणि विशाल पाटील यांचे बंधू प्रतिक पाटील विजयी झाले होते.