पुणे : सध्या संपूर्ण महाराष्ट्रात निवडणूकीचे वारे वाहू लागले आहेत. प्रत्येक पक्ष आपल्या पक्षासाठी सभांची तयारी करत आहे. याचदरम्यान, पुण्यातील भोर तालुक्यात दोन दिवसांपूर्वी महविकास आघाडीचा शेतकरी मेळावा पार पडला होता. त्यावेळी आमदार संग्राम थोपटे यांनी सुप्रिया सुळे यांना साथ देण्याचे ठरवलं आहे. याशिवाय शरद पवार यांनी देखील बारामती लोकसभा निवडणुकीचा उमेदवार सुप्रिया सुळे यांना जाहीर केलं होतं. मात्र, आता त्याच बारामती लोकसभा मतदार संघात असणाऱ्या भोर तालुक्यातील उत्रौली येथे सुप्रिया सुळे यांचा फोटो आणि चिन्ह असलेला प्रचाराचा फ्लेक्स फाडला असल्याचा प्रकार उघडकीस आला आहे. त्यामुळे बारामतीत राजकीय वातावरण तापण्याची शक्यता निर्माण झाली आहे.भोर तालुक्यातील उत्रौली गावात महाविकास आघाडीच्या उमेदवार खासदार सुप्रिया सुळे यांचा तुतारी चिन्हासह असलेला फ्लेक्स फाडण्यात आला आहे. अज्ञात व्यक्तींनी हा फ्लेक्स फाडला असल्याची महिती समोर आली असून यामुळे राजकीय वातावरण तापण्याची शक्यता निर्माण झाली आहे. फ्लेक्स फाडल्याची माहिती मिळाल्यानंतर हा फ्लेक्स कार्यकर्त्यांकडून काढण्यात आला आहे.
भाजपची अट, शिंदेसेनेच्या ६ खासदारांचा पत्ता कट? सर्व्हेमुळे अमित शहा टेचात, CM पेचात

बारामती लोकसभा मतदार संघात सुप्रिया सुळे यांच्या विरोधात सुनेत्रा पवार या उमेदवार असणार आहेत. तसेच सुनेत्रा पवार यांनी दौरे सुरू केले असून ज्या ठिकाणी सुनेत्रा पवार यांच्या कार्यक्रमाचे आयोजन करण्यात आले होते. त्याच परिसरात हे फ्लेक्स लावण्यात आले होते. त्यामुळे विरोधकांनी हे फ्लेक्स फाडले की काय? अशी शक्यता वर्तवली जात आहे. यामुळे महाविकास आघाडीचे कार्यकर्ते आक्रमक झाले असून राजकीय वातावरण तापण्यास सुरुवात झाली आहे. शरद पवार गटाचे कार्यकर्ते आक्रमक झाले आहेत. तसेच निवडणुक आचारसंहिता जाहीर होण्याआगोदरच राजकीय वातावरण चांगलेच तापले असल्याचे पाहायला मिळत आहे. त्यामुळे बारामती लोकसभा मतदार संघात लोकसभेचा धुराळा उडण्यास सुरुवात झाली असून एकमेकांविरोधात कुरघोडी करण्यास देखील सुरुवात झाली आहे.